काठमाडौं : बिमस्टेकको चौथो शिखर सम्मेलनका लागि काठमाडौं उपत्यकामा लागू गरिएको जोरबिजोर प्रणालीले सर्वसाधारणलाई सास्ती भएको छ ।
गृहमन्त्रालयले बुधबारदेखि तीन दिनसम्म जोर बिजोर प्रणाली लागू गरेको छ । बुधबार र शुक्रबार बिजोर र बिहीबार जोर नम्बरका सवारी सधान चल्न पाउने व्यवस्था गरिएको छ ।
पहिलो दिन बुधबार सवारी प्लेट नम्बरको अंक बिजोर भएका सवारीसाधन मात्र सञ्चालन गरिएकाले यात्रु समस्यामा परेका छन् । जोरबिजोर प्रणाली लागू हुँदा सडकमा सवारी चाप कम भए पनि यात्रु चाप भने बढेको छ ।
कलंकी, रत्नपार्क, भद्रकाली र त्रिपुरेश्वर लगायतका क्षेत्रमा सवारी साधन कम चल्दा यात्रुले हैरानी ब्यहोरे । गाडी चढ्न मारामार गर्नुपर्ने अवस्था सृजना भएको छ । सीमित सवारी सधान सडकमा गुड्दा यात्रुलाई गाडी चढ्नै समस्या भएको छ ।
ठाउँ ठाउँमा चेकजाँचसमेत कडाइ गरिएको छ । ठूलो संख्या प्रहरी परिचालन गरिएकाले सडकमा हिँड्नै पनि कठिन भएको छ । पुरानो बसपार्क मंगलबारबाटै बन्द गरिएको छ । गाडी चढ्ने ठाउँको टुंगो नहुँदा यात्रुको विचल्ली भएको छ ।
बिमस्टेकलाई सिँगारियो काठमाडौं
भोलीबाट हुने बिमस्टेकका लागि भने काठमाडौं महानगरलाई सिँगारेर चिटिक्क पारिएको छ । ठाउँ ठाउँमा स्वागतद्धार पनि बनाइएको छ । रंगरोगन गरेर महानगरका मूल सडक क्षेत्र चिटिक्क बनाइएको छ । पुरातात्विक र ऐतिहासिक सम्पदाका तस्बिर राखेर स्वागतद्धार बनाइएका छन् ।
स्वागतद्धार बिमस्टेकका सदस्य राष्ट्रका राष्ट्र प्रमुखका फोटोसहित सर्वोच्च शिखर सगरमाथादेखि डाँफे, मुनाल र हिमाली क्षेत्रको आकर्षक तस्वीर राखिएको छ ।
नेपालको विभिन्न क्षेत्रको कला तथा संस्कृति झल्कने तस्वीरले सजाएर चिटिक्क बनाइएको छ । तीनकुनेमा अझै कलात्मक ढंगले सजाइएको छ । नेपालको कला संस्कृति, पुरातात्विक सम्पदा, राष्ट्रिय जनवार, पक्षी लगायतका तस्बिर राखेर तीनकुनेको बाहिरी मुहार फेरिएको छ । पोखराको फेवाताल, डोल्पामो शे-फोक्सुण्डो तालदेखि नेपालका प्रशिद्ध मठ, मन्दिर, पर्यटकीय क्षेत्रको तस्बिर राखएको छ ।
सदस्यका राष्ट्रका झण्डा पनि चोक चोकमा फहराइएका छन् । माइतीघर मण्डलाको रङ्गरोगन गरेर सिँगारिएको छ । त्यहाँ झिलिमिली बत्तीको पनि व्यवस्था गरिएको छ ।
बिमस्टेकलाई केन्द्रित गरेर ठाउँ काठमाडौंको सडक मर्मत र रेलिङमा रंगरोगन गरिएको छ । मध्यमाञ्चल क्षेत्रीय सडक निर्देशनालयका प्रमुख शिवहरि सापकोटाले बिमस्टेलाई केन्द्रित गरेर काठमाडौंको सडक मर्मत गरिएको बताए ।
उनका अनुसार लामो समयदेखि जेब्राक्रसिङ नभएको कालिमाटी-त्रिपुरेश्वर सडक खण्डमा ठाउँ ठाउँमा जेब्राक्रसिङ बनाइएको छ । सडकको छेउछेउमा पेटीसमेत बनाइएको छ।
लैनचौर, सोल्टीमोड, कालिपाटी, माइतीघर, बानेश्वर र तीनकुने लगायतका क्षेत्रका सडक मर्मत गर्नुका साथै खाल्डाखुल्डी पुरिएका छन् । पाहुनाको स्वागतका लागि सडक सफाइसमेत गरिएको छ ।
प्रतिक्रिया दिनुहोस !
