गोरखा : गोरखाका भूकम्पपीडितलाई राहत, उद्धार, पुनर्निर्माण, पुनस्थापनामा सहयोग गर्न आएको एक एनजीओले आफ्ना स्टाफलाई घर बनाउन निर्माण सामग्री सहयोग गरेको छ । कारितास नेपाल नामक एनजीओले नमुना घर बनाउँदा खरिद गरेको सामग्री गोरखा नगरपालिका ५ की सोसियल एनिमेटर पार्वती श्रेष्ठलाई घर बनाउन सहयोग गरेको हो ।
श्रेष्ठलाई ३ हजार २ सय रुपैयाँ बराबरको ७१ थान इन्टर लकिङ इँटा सहयोग गरिएको एक स्टाफले बताए । अन्य वडामा ‘नमुनाघर’ बनाउन प्रयोग गरिएको सामग्रीबाट बचाएर स्टाफ श्रेष्ठलाई सहयोग गरिएको उनले बताए ।
संस्थाको बोर्डले निर्णय गरेर सहयोग गरिएको जिल्ला कार्यक्रम संयोजक कमल श्रेष्ठले जानकारी दिए । ‘निम्न आर्थिक अबस्थाका आफ्नो कर्मचारीलाई घर बनाउन सहयोग गर्ने निर्णय गरेका छौं’, श्रेष्ठले भने, ‘संस्थाको निर्णय अनुसार सहयोग गरेकोहो । धेरै रकमको सहयोग पनि छैन । जम्मा ३२ सय रुपैयाँको सहयोग हो ।’उक्त निर्णय अनुसार अहिलेसम्म अरु स्टाफ कसैलाई पनि सहयोग नगरिएको उनले बताए ।
वडा नं. १० को नमूनाघर निर्माण गर्दा सामग्री उपारेर स्टाफको घर निर्माणमा सहयोग गरिएको कारितासले जनाएको छ ।कारितासले क्याथोलिक रिलिफ सर्भिस (सिआरएस) सँगको समन्वयमा भूकम्प पीडितलाई राहत, पुनर्निर्माण तथा पुनस्थापनाको काम गर्दै आएको छ । नमुना घर निर्माणका लागि खरिद गरिएको सामग्रीले स्टाफको घर निर्माण गर्न प्रदान गरेपछि असन्तुष्ट कर्मचारीले दातृसंस्था सिआरएस र कारितासको मुख्य कार्यालयमा उजुरी समेत गरेका थिए ।
भूकम्प पीडितलाई राहत, उद्धार, पुनर्निर्माण तथा पुनःस्थापनाका लागि प्राप्त बजेट जथाभावी निर्णय गरेर खर्च गर्न नमिल्ने दातृसंस्था सिआरएसका कार्यक्रम संयोजक रामहरि देवकोटाले बताए । ‘कारितासले गरेको काम गलत हो’, देवकोटाले भने, ‘बोर्डले निर्णय गरेको भन्दैमा जे पनि निर्णय गरेर खर्च गर्न पाउँदैन ।’
प्रतिक्रिया दिनुहोस !
