रोनाल्डो र सलाहलाई पछि पार्दै लुका मोड्रिच बने युरोपको सर्वाेत्कृष्ट खेलाडी

मोनाको : क्रोएसियाको फुटबल टोलीका कप्तान लुका मोड्रिच युरोपको सर्वाेत्कृष्ट फुटबलर घोषित भएका छन् । युरोपेली फुटबल संघ (यूईएफए)ले बिहीबार राति गरेको आफ्नो वार्षिक अवार्ड कार्यक्रममा रियल म्याड्रिडबाट व्यावसायिक फुटबल खेल्दै आइरहेका मोड्रिच गत वर्ष गरेको प्रदर्शनका आधारमा युरोपकै सर्वाेत्कृष्ट फुटबलर घोषित भएका हुन् ।

मोड्रिचले गत सिजन रियल म्याड्रिडलाई युरोपियन च्याम्पियन्स लिगको उपाधि दिलाउन महŒवपूर्ण योगदान दिएका थिए । रियलले गत वर्ष लगातार तेस्रो वर्ष र पछिल्लो पाँच सिजनमा चौथोपटक च्याम्पियन्स लिग उपाधि जितेको थियो । उनले गत महिना रुसमा भएको फिफा विश्वकप फुटबलमा पनि आफ्नो टोलीलाई फाइनलसम्म पु¥याएका थिए । क्रोएसिया विश्वकपको फाइनलमा पुगेको यो नै पहिलो अवसर थियो । यद्यपि फाइनलमा फ्रान्ससँग ४–२ गोलले पराजित भएपछि क्रोएसिया उपाधिबाट वञ्चित भएको थियो ।

मोड्रिच गत सिजन च्याम्पियन्स लिग खेलेका क्लबका प्रशिक्षक र युरोपबाट छनोट गरिएका सीमित खेल पत्रकारहरूको भोटिङमार्फत युरोपकै सर्वाेत्कृष्ट फुटबलर घोषित भएका हुन् । युरोपकै सर्वाेत्कृष्ट खेलाडी घोषित भएपछि मोड्रिच निकै खुसी देखिए । ‘मेरा लागि यो साँच्चिकै अविश्वसनीय क्षण हो । यो महŒवपूर्ण अवार्ड जित्दा निकै खुसी लागेको छ’, मोड्रिचले भने ।

मोड्रिचले अवार्डका लागि आफ्नै क्लबका पूर्वसहकर्मी क्रिस्टियानो रोनाल्डो र लिभरपुलका स्ट्राइकर मोहम्मद सलाहलाई पछि पारेका हुन् । तीमध्ये सलाह र मोड्रिच मात्रै अवार्ड समारोहमा उपस्थित थिए । यसै सिजन रियल छाडेर इटालियन क्लब युभेन्टस पुगेका क्रिस्टियानो रोनाल्डो भने अवार्ड समारोहमा उपस्थित थिएनन् ।

युभेन्टसका प्रमुख कार्यकारी अधिकृत (सीईओ) जुउसेप्पी मारोट्टाले अवार्ड समारोहमा उपस्थित नहुने रोनाल्डोको व्यक्तिगत निर्णय रहेको जनाए । ‘समारोहमा उपस्थित नहुने रोनाल्डोको व्यक्तिगत निर्णय हो । त्यसलाई हामीले स्वीकार गर्नुपर्छ’, समारोहमा उपस्थित भएका सीईओ मारोट्टाले भने ।

रोनाल्डो पनि गत सिजन गरेको प्रदर्शनका आधारमा युरोपको उत्कृष्ट स्ट्राइकर घोषित भएका छन् । युरोपको उत्कृष्ट खेलाडीको अवार्डमा रियल म्याड्रिडकै खेलाडीहरूको बाहुल्य रह्यो । सर्वाेत्कृष्ट खेलाडी घोषणा भएका मोड्रिच गत सिजनको उत्कृष्ट मिडफिल्डर पनि चुनिए । यस्तै केलोर नाभास उत्कृष्ट गोलरक्षक र कप्तान सर्जियो रामोस उत्कृष्ट रक्षक घोषित भए ।

युरोपको सर्वाेत्कृष्ट महिला खेलाडीको अवार्ड डेनमार्क र जर्मन क्लब वल्फसबर्गकी खेलाडी पर्निल्ले हार्डले जितिन् । इङ्ल्यान्डका पूर्वकप्तान डेभिड बेकह्याम प्रेसिडेन्टन्स अवार्डबाट सम्मानित भए । यूईएफएले फुटबलबाट प्राप्त आफ्नो छवि प्रयोग गरी मानवीय कार्यमा सक्रिय रहेकाले बेकह्यामलाई सो अवार्डबाट सम्मानित गरिएको जनाएको छ ।