इलाम : इलामको राँके बजारमा आइतबार राति भएको आगलागीमा करिब २ करोड बराबरको क्षति भएको छ।आइतबार राति राँके बजारको ठालुमान श्रेष्ठको घरमा साँझ लागेको आगोले श्रीबहादुर विष्टको करिब ५० लाख बढीको जुत्ता चप्पल र कपडा जलेर नष्ट भयो। बिहान भग्नावशेष पसल लेखाउँदै भने, 'पन्ध्र वर्षको कमाई हेर्दाहेर्दै स्वाहा भयो।'
विष्टको पसलसँगै जोडिएको अर्का व्यापारी तीलबहादुर बस्नेतको सटरमा रहेको किराना पसलमा नगद, सुनचाँदीसहित ५० लाखको क्षति भएको प्रहरीले जनाएको छ। तीलबहादुरले पाँच वर्षदेखि राँके बजारमा किराना पसल संचालन गर्दै आएका थिए।उनको किरानामा रहेको ४५ लाख बराबरको सामान, २ लाख ८० हजार नगद, २ लाख ५० हजार सुन, २४ हजारको चाँदी जलेको प्रहरीले जनाएको छ।
आगलागीबाट घर मालिक ठालुमान श्रेष्ठको करिब एक करोडको क्षती भएको छ। ठालुमानका भाई नरबहादुर श्रेष्ठकोसँगै जोडिएको घरमा पनि १० लाख बराबरको क्षति भएको पीडितले बताएका छन् ।
आगो स्थानीयबासी, पाँचथरबाट आएको दमकल, नेपाल प्रहरी, सशस्त्र प्रहरी, नेपाली सेनालगायत आगो पूर्णरुपमा नियन्त्रणमा आएको थियो।राँके बजारमा चार वर्ष अघि पनि यस्तै विपती आएको थियो। त्यतिबेला आगलागीमा ६ करोड बराबरको क्षति भएको थियो। चार वर्षअघि आगोले खाएका घरहरुको पुन:निर्माण सकिन नपाउँदै अर्को विपती आइलागेको स्थानीय युवा नरेश श्रेष्ठले बताए।
प्रतिक्रिया दिनुहोस !
