काठमाडौँ : बिमस्टेक सम्मेलन सकिए लगत्तै काठमाडौँमा नेपालसहित विभिन्न २४ देशका सेनाका उच्च अधिकृतहरुको सम्मेलन सुरु भएको छ । नेपालसहित २४ देशका उच्च सैनिक अधिकृतहरुको भेला काठमाडौँको हायात होटलमा सोमबारबाट सुरु भएको हो ।
नेपाली सेना र युएस इन्डो प्यासिफिक कमान्ड डाइरेक्टोरेट अफ इन्टेलिजेन्सको संयुक्त आयोजनामा सुरु भएको एसिया प्यासिफिक इन्टेलिजेन्स चिफ्स सम्मेलनको उद्घाटन कामु प्रधानसेनापति पूर्ण चन्द्र थापाले गरेका छन् ।
नेपालमा पहिलो पटक भइरहेको यो सम्मेलनमा २३ वटा छिमेकी देशका ८३ जना उच्च तहका सैनिक अधिकृत र नेपाली सेनाबाट २० जनासहित एक सय तीनजना सहभागी रहेका छन् ।
तीन दिन अर्थात् भदौ २० गतेसम्म हुने यस सम्मेलनमा सहभागी हुन भएका विदेशी सैनिक अधिकृतहरुलाई यहाँ चर्चित पर्यटकीय स्थल पनि घुमाउने कार्यक्रम रहेको सैनिक जनसम्पर्क निर्देशनालयले जनाएको छ ।
यस बहुराष्ट्रिय संयुक्त सम्मेलनले वर्तमान र भविष्यमा आइपर्न सक्ने रणनैतिक सुरक्षा चुनौतीको सामना र समाधानबारे छलफल गर्ने भएको छ ।
त्यसैगरी यो सम्मेलनले अन्तर्राष्ट्रियस्तरमा भेटघाट, छलफल र समन्वयमार्फत् पेशागत विशेषज्ञता आदान-प्रदान भएर सैनिक क्षमता थप बढ्ने विश्वास गरिएको सैनिक जनसम्पर्क निर्देशनालयले जानकारी दिएको छ।
प्रतिक्रिया दिनुहोस !
