सिरहा : लहान नगरपालिका–१७ स्थित माध्यमिक विद्यालय झिरहरीका शिक्षक नारायणप्रसाद साहले आर्थिक वर्ष ०७४÷०५ को दोस्रो चौमासिक तलब अझै पाउन सकेका छैनन् । ०७४ मंसिरदेखि फागुनसम्मको तलब र पोसाक भत्ताबापतको १ लाख ५८ हजार रुपैयाँ नपाएपछि शिक्षक साहले नगरपालिका कार्यालयमा ०७५ वैशाख १३ गते निवेदन दर्ता गराएका थिए । त्यसपछि नगरपालिकाले निमित्त प्रधानाध्यापक मोहम्मद अब्दुल अजिजलाई वैशाख २४ गते तलब नदिनुको कारण सोधी तीन दिनभित्र तलब दिई सोको जानकारी गराउन भनेको थियो । प्रअको बेवास्ताले समस्या भएपछि नगरपालिकाले त्यसपछिको तलब शिक्षकको व्यक्तिगत खातामै पठाउन थालेको थियो ।
शिक्षा कार्यालयले अजिजलाई पशुपति माध्यमिक विद्यालय सरुवा पदस्थापना ग¥यो । तर उक्त सरुवा कानुनविपरीत भएको भन्दै अजिजले अदालतमा रिट दायर गरेका थिए । अदालतबाट निषेधज्ञा ल्याएर अजिज झिरहरी विद्यालयमै फर्किए । त्यसपछि विद्यालयको खाता आफ्नो नाममा सञ्चालन हुनुपर्ने भन्दै नगरपालिकामा निवेदन दिए । सोहीअनुसार नगरपालिकाले दिएको सिफारिसका आधारमा खातामा अजिजले आफू र निजी स्रोतका शिक्षक महेशकुमार महतोलाई राखे ।
लेखापाल रहेका विद्यालयमा प्रअ र लेखापालको नाममा खाता सञ्चालन हुने व्यवस्था छ । लेखापाल नभएको विद्यालयमा प्रअ र स्थायी शिक्षकको नाममा खाता सञ्चालन हुने गर्छ । तर अजिजले कानुनविपरीत निजी स्रोतका दरबन्दी भएका शिक्षकको नाममा विद्यालयको खाता सञ्चालन गरेका त्यस विद्यालयका शिक्षकहरूले आरोप लगाएका छन् ।
लहान नगरपालिकाका शिक्षा संयोजक भवानी कट्टेलले निकासा भइसकेको रकम शिक्षकलाई उपलब्ध गराउन आफूहरूले पनि पटक पटक निर्देशन दिएको बताए । ‘शिक्षकहरूले तलब नपाएको गुनासो गर्नासाथ यहाँबाट प्रअ अजिजलाई निर्देशन गरेका छौं’, उनले भने, ‘यस विषयमा फेरि कुरा गर्छौं ।’ खाताधारी प्रअ अजिज भने यस विषयमा केही बोल्न चाहेनन् ।
प्रतिक्रिया दिनुहोस !
