बेलबारी : झापाको बिर्तामोड युनाइटेड दोस्रो अन्तर्राष्ट्रिय आमन्त्रण डाँगीहाट गोल्डकप फुटबल प्रतियोगिताको सेमिफाइनलमा प्रवेश गरेको छ । मोरङको बेलबारी नगरपालिका–११ लक्ष्मीमार्गको मैदानमा आइतबार भएको खेलमा आयोजक डाँगीहाट युवा क्लबलाई टाइब्रेकरमा ५–३ गोलले स्तब्ध बनाउँदै साबिक विजेता बिर्तामोडले अन्तिम चारमा स्थान सुरक्षित गरेको हो । संघर्षपूर्ण खेलको निर्धारित समय गोलरहित बराबरीमा सकिएपछि खेलको निर्णय टाइब्रेकरबाट लिइएको थियो । टाइब्रेकरमा बिर्तामोडको भाग्य चम्किँदा घरेलु मैदानमा आयोजक निराश बन्न पुग्यो ।
पृथ्वी चौधरी, रोशन थाम्स्वाङ, नानी लिम्बू, सञ्जय धिमाल र दिलेन लोक्तामले गोल गर्दा बिर्तामोडको जित पक्का भएको थियो । आयोजकका अरुण लिम्बू, उमेश कार्की र विक्रम लिम्बूको प्रहारले मात्रै जाली चुमेको थियो । सुरेन्द्र खवासको प्रहार बिर्तामोडका गोलरक्षकले असफल बनाइदिँदा आयोजक अभागी ठहरियो ।
घरेलु मैदानमा उत्कृष्ट प्रदर्शन गरेको आयोजकले नतिजा भने विपक्षीलाई सुम्पिन बाध्य भयो । आयोजक पहिलो डाँगीहाट गोल्डकपमा बिर्तामोडसँगै सेमिफाइनलमा भोगेको पराजयको बदला लिनबाट पनि चुक्यो । बिर्तामोडले पनि खेल अवधिभर गोलका लागि पाएका केही अवसरलाई सदुपयोग गर्न नसक्दा जितका लागि टाइब्रेकरसम्म पर्खनु प¥यो ।
१४औं मिनेटमा तीर्थ बस्नेतको प्रहार दायाँ बार हुँदै बाहिरिँदा आयोजकले अग्रता लिने अवसर गुमायो । ५४औं मिनेटमा आयोजकका विक्रम लिम्बूको फ्रिकिक प्रहारले विपक्षी बार भत्काउन सकेन । ६५औं मिनेटमा तीर्थकै दोस्रो प्रयासमा पनि बिर्तामोडका गोलरक्षक बाधक बने । ७३औं मिनेटमा अरुण लिम्बूको प्रहार क्रसबारमाथिबाट बाहिरियो । त्यसपछि खेल टाइब्रेकरमा धकेलिएको थियो ।
४० औं मिनेटमा बिर्तामोडका रोजिन माझीको कर्नर पासमा रोशन थाम्स्वाङको हेड पोस्टमाथिबाट बाहिरिएको थियो । ६० औं मिनेटमा बिर्तामोडका विशाल दर्जीले गरेको हेड आयोजकका गोलरक्षक बाधक बने । ७२ औं मिनेटमा नानी लिम्बूको प्रहार क्रसबारमाथिबाट बाहिरिँदा बिर्तामोडले निर्धारित समयमा नतिजा निकाल्न सकेन ।
आइतबारको खेलको म्यान अफ दी म्याच बिर्तामोडका आशिष चापागाईं घोषित भए । सोमबार भारतको खर्साङ युनाइटेड क्लब र मोरङ फुटबल एकेडेमी मंगलबारेबीच खेल हुनेछ ।
प्रतिक्रिया दिनुहोस !
