लिबाङ : गोली हानी हत्या गरिएका रोल्पा नगरपालिकाका तरुण दल नगर सभापति रोहित पुनको शव परिवारले वुझेका छन् । हत्यामा संलग्न फरार युवालाई पक्राउ गर्न र पक्राउ परेकालाई आजिवन कैदको माग गर्दै पीडित परिवारले यसअघि शव वुझ्न अस्विकार गरेका थिए । दोषीलाई कानून वमोजिम पक्राउ र कारवाही गर्ने सहमतिपश्चात मंगलबार परिवारले शव वुझेका हुन् ।
तरुण दलले हत्याको विरोधमा सोमबार बजार वन्द गरेको थियो । तरुण दल र कांग्रेसले विरोध प्रदर्शन गर्दै दोषीलाई कारवाही गर्नुपर्ने, पुनलाई सहिद घोषणा गर्नुुपर्ने र परिवारलाई क्षतिपुर्ति दिनु पर्ने माग गरेका थिए । विरोधका क्रममा प्रमुख जिल्ला अधिकारी गञ्जबहादुर एमसीले सर्वदलिय वैठक बोलाई छलफल गरेका थिए । छलफलमा दोषीमाथी कारवाही हुने, सहिद घोषणा र क्षतिपूर्ति मागबारे गृह मन्त्रालयमा लेखी पठाउने सहमती भएपछि परिवारले शव वुझ्ने वातावरण वनेको हो ।
परिवारले शव वुझ्न अस्विकार गरेपछि पोष्टमार्टम् पनि हुन सकेको थिएन् । शव वुझेपछि मंगलबार विहान पोष्टमार्टम गरिएको जिल्ला अस्पताल रउघाका मेडिकल अफिसर डा. अनिल केसीले जानकारी दिए । छाती मुनि देव्रे भागमा गोली लागेर मृत्यु भएका पुनको शरिरमा निलडाम समेत भेटिएको उनको भनाइ छ । अण्डकोष सुन्निएको, कुटपिटपछि समातेर गोली हानेर हत्या गरेको हुनसक्ने मृतक पुनका जेठान रक्ष वलीले जनाए ।
कांग्रेसका जिल्ला उपसभापति किशोर आचार्यका अनुसार शवलाई पार्टी कार्यालय प्राङ्गनमा राखेर श्रद्धाञ्जली दिइएको छ । पीडित परिवारले जिल्ला प्रहरी कार्यालयमा किटानी जाहेरी दिएका छन् । घटना स्थलबाट पेस्तोल र दुई थान गोलीसहित रोल्पा नगरपालिका–१० धबाङका देवबहादुर घर्ती पक्राउ परेका थिए ।
घटना हुँदा साथमा रहेका चारयुवालाई पनि प्रहरीले पक्राउ गरेको छ । पक्राउ पर्नेमा रोल्पा नगरपालिका–२ प्रकाश डाँगी, निरज श्रेष्ठ, प्रकाश डाँगी र रोल्पा नगरपालिका–१० धबाङका दिपक पुन छन् । पक्राउ परेका पाँचैजनालाई अदालतबाट दश दिनको म्याद थप गरी अनुसन्धान भइरहेको जिल्ला प्रहरी प्रमुख एवं प्रहरी नायव उपरिक्षक दिपक खड्काले जानकारी दिए । घटनामा संलग्न फरार तीन युवाको खोजी भइरहेको प्रहरीको भनाइ छ । हत्या गरिएका पुनका ९ वर्षीय छोरा, पत्नी, आमा र दाईभाउजु छन् ।
प्रतिक्रिया दिनुहोस !
