जाजरकोट : अवैध मेडिकल सञ्चालकलाई कारबाही माग गर्दै आफन्तले शव बुझ्न मानेका छैनन् । छेडागाड नगरपालिका–५, थलहबजारस्थित जयलक्ष्मी मेडीको फर्ममा उपचार गर्न गएकी छेडागाड १०, नल्फुकी ३८ वर्षिया पन्चकला नाथ योगीको स्वास्थ्यकर्मीको लापरवाहीले ज्यान गएको भन्दै पीडितले शव बुझ्न नमानेका हुन् ।
सामान्य ज्वरोको उपचारका लागि गएकी ती महिलाको मेडिकल सञ्चालक तिलक बोहराको लापरवाहीले ज्यान गएको आफन्तको आरोप छ । उनको मेडिकलसमेत अवैध भएकाले घटना जटिल बन्दै गएको छ । मेडिकल सञ्चालकलाई शुक्रबार नै प्रहरीले पक्राउ गरेर अनुसन्धान थालिसकेको छ । तर, मेडिकल सञ्चालक पक्षले आर्थिक लेनदेनमा घटना गुपचुपमै मिलाउने प्रयास गरिरहेका छन् । घटना मिलाउन नेतासमेत सक्रिय भएको बताइएको छ ।
मेडिकलमा नभई घर जाने क्रममा ती महिलाको मृत्यु भएकाले उपचारमा कुनै लापरवाही नभएको मेडिकल सञ्चालक पक्षको भनाइ छ । पीडित पक्षले मेडिकलमा ज्वरोको तीन वटा सुई लगाएको केही घण्टामै मृत्यु भएकाले उपचारमा लापरवाही भएको भन्दै क्षतिपूर्ति र कारबाही माग गरिरहेको छ । उपचारमा लापरवाही गरेर बुहारीको ज्यान गएको ससुरा सेतुनाथ योगीले बताए । उनले भने, ‘बुहारीलाई ज्वरो आएको र सामान्य छाती दुख्ने समस्या भएपछि बिहीबार थलबजारकोे उक्त मेडिकल लगेका थियौं । मेडिकल सञ्चालक बोहराले चेक गरेपछि एकै पटक ३ वटा सुई लगाइदिए, औषधि खान दिए । केही समयपछि घर लैजाने क्रममा बुहारी एक्कासि बेहोस भइन् । बुहारीको होसै नखुली मृत्यु भयो ।’ उचित क्षतिपूर्ति र अवैध मेडिकल सञ्चालक बोहरालाई कारबाही नगरेसम्म लास नउठाउने उनले बताए ।
पाँच वर्षअघि पतिको मृत्यु भएपछि एकल जीवन बिताइरहेकी योगीका २ छोरा र एक छोरी छन् । घटनाबारे अनुसन्धान भइरहेको प्रहरी निरीक्षक लोकबहादुर विष्टले बताए । सुर्खेतस्थित जयलक्ष्मी मेडीको फर्मको नामबाट बोहराले थलहबजार लामो समयदेखि अवैध रूपमा मेडिकल सञ्चालन गर्दै आएका थिए ।
प्रतिक्रिया दिनुहोस !
