इलाम : गोदक गाउँ विकास समिति इलाम नगरपालिकामा गाभिएर वडा नं १० बनेपछि जनतामा अनावश्यक बोझ थपिएको ठान्छन् स्थानीयको गुनासो बढ्दै गएको छ ।
‘नागरिकसँग मेयर’ नामको कार्यक्रम लिएर वडा कार्यालय पुगेका मेयर महेश बस्नेतलाई अघिल्तिर राखिएपछि स्थानीय अगुवा ध्रुव अधिकारीले मुख खोले, ‘कर तिर्न सक्ने बनाउनुस् अनि कर तिर्छौं ।’ स्रोत र क्षमता नहेरी कर वृद्धि गरेको भनी गुनासो पोख्ने अधिकारी पहिलो व्यक्ति भने हैनन् । इलाम नगरपालिका–७ का देवी पौड्यालले पनि नगरपालिकाले भूमिदेखि पानीसम्ममा कर लगाएको आरोप लगाइन् । चुनावपछि जनताको मर्का सुन्न गाउँ पुगेका बस्नेतलाई जनताले कर–शुल्क आदिको नाममा जनता क्षमताभन्दा अग्लो करको बोझ थपिदिएको गुनासो मात्रै पोख्दैनन् विकासको अनुभूति गर्न नपाएकोमा आक्रोशसमेत व्यक्त गर्ने गर्छन् ।
करबारे नागरिकलाई सम्झाउन पुगेका बस्नेतले वडा नं २ सुम्बेकका नागरिकका गुनासा सुनेपछि भने, ‘देश अरूले बनाइदिँदैन आफैंले बनाउने हो ।’ उनी कर नतिरी विकास सम्भव नहुने जिकिर गर्दै थिए । उनले गाउँको विकासका लागि नगरपालिकाले सकेको सहयोग गर्ने भन्दै नागरिक नै नजुटी गाउँ नबन्ने तर्क राखे ।
नगरपालिकाले चाँडै लगानी सम्मेलन गर्न लागेकाले पनि नागरिकको सल्लाह सम्मेलनका लागि फलदायी हुने भन्दै अभियान सुरु गरेको नगरपालिकाले जनाएको छ ।
नागरिकले मेयरसमक्ष गाउँको सडक बनाउन, बिजुलीको पोल फेरिदिन, खानेपानीको व्यवस्था गरिदिन माग गरेका छन् । मेयर बस्नेतले सीमित साधनको प्रयोग गरेर भए पनि जनताको अपेक्षा पूरा गर्ने आश्वासन दिएका छन् । अभियान नगरका १२ वटै वडामा सञ्चालन गर्ने नगरपालिकाले जनाएको छ । कर वृद्धिको विरोधमा नागरिक उत्रिएपछि सूर्योदय नगरपालिकाले पनि वडा वडामा कर सचेतना कार्यक्रम सुरु गरेको छ ।
कर वृद्धिविरुद्ध संघर्ष समिति नै गठन गरेर नागरिकले असन्तुष्टि जनाएपछि नगरपालिकाले टोल विकास संस्थाका प्रतिनिधि, संघसस्थाका प्रतिनिधिहरूलाई भेला पारी जनगुनासो सुन्ने र करबारे जानकारी गराउन सुरु गरेको नगरपालिकाले जनाएको छ । सूर्योदय नगरपालिकाले दुई वटा वडामा यस्तो कार्यक्रम सम्पन्न गरेको जानकारी दिएको छ । सूर्योदय नगरपालिकाले यसअघि पनि गुनासो चौतारी कार्यक्रममार्फत जनताको गुनासो र सुझाव संकलन गरिसकेको मेयर रणबहादुर राईले जानकारी दिए ।
प्रतिक्रिया दिनुहोस !
