धनकुटा : धनकुटा–६ सरस्वती चोकस्थित टाइगर हिल पार्कमा क्रिसमस जातको बिरुवा लस्करै रोपिएका छन् । हरेक बिरुवाको हाँगामा परिचय दिने खालको कार्ड झुन्ड्याइएको छ । कार्डमा बिरुवाको नाम, नम्बरसँगै बिरुवा संरक्षण गर्ने व्यक्तिको नाम तथा ठेगाना उल्लेख छ ।
पार्कभित्र रहेका ती बिरुवाको संरक्षण गर्न सरस्वती टोलबस्ती संगठनले नौलो उपाय अपनाएको छ । संगठनमा आबद्ध हरेक सदस्यलाई एउटा÷एउटा बिरुवा संरक्षण गर्ने जिम्मेवारी तोकिएको छ । संगठनको बैठकबाट निर्णय गरेर हरेक सदस्यलाई बिरुवा संरक्षणको जिम्मेवारी दिइएको अध्यक्ष दुर्गा निरौलाले बताइन् । पार्कमा क्रिसमस जातका ३३ ओटा बिरुवा रोपिएको छ । ‘बिरुवा रोप्नु मात्र ठूलो कुरा होइन । हुर्काउने कार्य पनि चुनौती रहेछ’, उनले भनिन्, ‘सबै सदस्यबाट सामूहिक रूपमा बिरुवा हुर्काउन र संरक्षण गर्न सम्भव छैन । जसको कारण हरेक सदस्यलाई एक बिरुवा संरक्षण गर्ने उपाय अपनाएका हौं’, सो कार्यले टोलबस्ती संगठनका सदस्यहरूमा जिम्मेवारीको भावना बढेको छ । उनले थपिन्, ‘सदस्यहरूमा जिम्मेवारीबोधको भावना जागृत भएको छ ।’
बिरुवा संरक्षणको दायित्व हरेक सदस्यलाई दिइएको छ । हरेकले आ–आफ्नो बिरुवाको हेरचाह, रेखदेख, निगरानीका साथै गोडमेल पनि आफैं गर्नुपर्छ । आफूले जिम्मेवारी पाएको बिरुवा संरक्षण अभावले मरे, गाइबस्तुले खाइदिए स्वयं सदस्य नै जिम्मेवारी हुनेछन् । यो कार्यले पार्कभित्र रहेका बिरुवाको संरक्षण भएको अध्यक्ष निरौलाले दाबी गरिन् । उनका अनुसार कसले राम्रोसँग बिरुवा संरक्षण गर्दै हुर्काउने भन्ने विषयमा सदस्यबीच नै होडबाजी चलेको छ । हुर्किरहेका बिरुवाले मलजल राम्रो पाएका छन् । चाँडो हुर्किएका छन् ।
टाइगर हिलबाट धनकुटा बजारको दृश्य स्पष्ट देखिने भएकाले धनकुटा घुम्न आएका पर्यटक एक पटक त्यहाँ पुग्ने गर्छन् । कोसी राजमार्गअन्तर्गतको धनकुटा–हिले सडकखण्डको छेउमै पर्ने भएकाले यहाँ घुम्न आउनेको संख्या प्रतिदिन बढिरहेको छ ।
प्रतिक्रिया दिनुहोस !
