मोरङलाई उपाधि

बेलबारी : मोरङ फुटबल एकेडेमीले दोस्रो अन्तर्राष्ट्रिय आमन्त्रण डाँगीहाट गोल्डकप फुटबल प्रतियोगिताको उपाधि जितेको छ ।मोरङको बेलबारी नगरपालिका-११, लक्ष्मीमार्गको खेल मैदानमा शनिबार सम्पन्न फाइनलमा साविक विजेता बिर्तामोड युनाइटेडलाई ६-० को फराकिलो अन्तरले निराश बनाउँदै मोरङले उपाधि जितेको हो ।

साविक उपविजेता मोरङको जितमा कर्ण लिम्बू एक्लैले ह्याट्रिक गरे । उत्कृष्ट खेल पस्किएको मोरङको सनसनीपूर्ण जितमा निशान लिम्बू, सौजन राई र विदेशी खेलाडी पेन्कले एकएक गोल गरे । मोरङले पहिलो संस्करणको फाइनलमा बिर्तामोडसँगै पराजय बेहोरेको थियो । मोरङले यसपटक त्यो हारको बदला लियो ।

खेलको सुरुआतदेखि नै तालमेल गुमाएको बिर्तामोडलाई मोरङले अन्तिम समयसम्म पनि कुनै मौका दिएन । एकपक्षीय खेलमा मोरङले पाएको अवसरको सदुपयोग गर्दा सहज जित निकाल्न सक्यो । उपाधिसँगै मोरङले दुई लाख २२ हजार दुई सय २२ रुपैयाँमा प्राप्त ग¥यो । उपविजेता बिर्तामोडले एक लाख ११ हजार एक सय ११ रुपैयाँमा चित्त बुझायो ।

सुरुआतमै झापाविरुद्ध दबाब सिर्जना गरेको मोरङले खेलको पाँचौं मिनेटमै पहिलो गोल गरेको थियो । विदेशी खेलाडी पेन्कको रिबाउन्ड बललाई निशान लिम्बूले गोल गरे । त्यसको एक मिनेटपछि नै कर्ण लिम्बूले मोरङको अग्रता दोब्बर बनाए । आफ्नै प्रहार दोस्रो बारमा लागेर फर्किएपछि कर्णले नै हेड गर्दै बललाई जाली चुमाएका थिए । ३८औं मिनेटमा विवेक पौडेलको पास लिएर एक्लै अघि बढेका सौजन राईले वान भर्सेस वानको स्थितिमा बललाई पोस्टको दिशा दिँदा पहिलो हाफमा मोरङ ३-० गोलले अघि रह्यो ।

खेलको ५६औं मिनेटमा बिर्तामोडका गणेश हेमरनले डिबक्सभित्र कर्ण लिम्बूलाई फल गरेपछि रेफ्री श्याम दनुवारले मोरङलाई पेनाल्टी दिएका थिए । पेनाल्टीमा पेन्क चुकेका थिए ।

निशान लिम्बूको पासमा कर्णले बललाई जाली चुमाउँदा ५९औं मिनेटमा मोरङ ४-० ले अघि बढ्यो । ६४औं मिनेटमा विवेक पौडेलको क्रस पासमा एक्लै बल लिएर अघि बढेका कर्ण लिम्बूले बललाई जाली चुमाउँदा उनले ह्याट्रिक पूरा गरे । मध्यान्तरपछिको इन्जुरी समयमा सुरज राईको पासमा विदेशी खेलाडी पेन्कले गोल गर्दै टोलीलाई ६-० को फराकिलो अन्तरले विजयी बनाए ।

पाएका थुप्रै अवसरलाई खेर फाल्दा बिर्तामोड पराजित हुन पुग्यो । ३४औं मिनेटमा रोशन थाम्स्वाङको पासमा लक्ष्मण चौधरी चुके । मध्यान्तरपछि केही सुधारिएको प्रदर्शन गरेको बिर्तामोडका नानी लिम्बूले ४८औं मिनेटमा गोल गर्न सकेनन् । आशिष चापागार्इंको पासमा खाली पोस्टमा लिम्बू चुक्दा बिर्तामोड अभागी ठहरियो । ५१औं मिनेटमा आशिष चापागाईंकै प्रहार मोरङका जीवन धामीले क्लियर गरेका थिए ।

शनिबारको खेलको म्यान अफ दी म्याच मोरङका जीवन धामी घोषित भए । प्रतियोगिताको म्यान अफ दी सिरिज मोरङका विवेक पौडेल भए । उनले नगद १० हजार रुपैयाँ पुरस्कार प्राप्त गरे । मोरङका किशोर गिरी उत्कृष्ट गोलरक्षक बने । सर्वाधिक गोलकर्ता र उत्कृष्ट स्ट्राइकरको उपाधि कर्ण लिम्बूले प्राप्त गरे । उत्कृष्ट डिफेन्सको उपाधि मोरङका प्रवेश दनुवारले पाए । उदीयमान खेलाडी आयोजक डाँगीहाटका मनीष राई र मिडफिल्डर मोरङकै संजोग राई घोषित भए । उत्कृष्ट प्रशिक्षक मोरङका सञ्जीव बुढाथोकी भए । विजेतालाई अखिल नेपाल फुटबल संघ (एन्फा)का अध्यक्ष कर्माछिरिङ शेर्पा, आयोजक समितिका अध्यक्ष विक्रम राई लगायतले पुरस्कार प्रदान गरे ।