इलाम : जीवनभरि सुख दिन्छु भन्दै भारत बेच्न लगिएकी फिदिम नगरपालिकाका–५ की १९ वर्षीया युवतीलाई नेपाल प्रहरी, भारतीय सुरक्षाकर्मी र माइती नेपालको टोलीले इलामको पशुपतिनगर नाकाबाट घर फर्काएको छ ।
प्रहरीले मानव बेचबिखनमा संलग्न भारत दार्जिलिङ राङवाङका दलवीर मुखिया र विवेक राईलाई पक्राउ गरेको छ । दुवैलाई मानव बेचबिखन तथा ओसारपसारअन्तर्गत मुद्दा दायर गरिएको छ ।
प्रहरीका अनुसार विवाह गर्छु, जिन्दगीभर सुख दिन्छु भनी फकाउँदा नमानेपछि पाँचथर घुमाइदिन आग्रह गरेका थिए । पीडित युवतीले जबर्जस्ती राँकेसम्म ल्याएको प्रहरीले बयान दिएकी छन् । उनका अनुसार पाँचथर घुमाइदेऊ भनी बोलाई कुराकानी गर्दा गर्दै हामी भारत फर्किन लागेको परसम्म लगिदेऊ भनी राँकेसम्म गाडीमा ल्याएका थिए । पछि गाडी रोक्न आग्रह गर्दा परिवारले थाहा पाएर केटी मान्छेको इज्जत गयो भन्दै फकाएर पशुपतिनगरसम्म पुर्याएका थिए ।
उच्चशिक्षा पढेकाहरू पनि दलालको पञ्जामा पर्ने गरेका छन् ।
भदौ २९ गते साँझ नाका कटाउन लाग्दा तैनाथ सुरक्षाकर्मी र माइती नेपालको टोलीले युवतीको उद्धार गरेको माइती नेपाल पशुपतिनगरका प्रमुख होम ढकालले जानकारी दिए । उनलाई आवधिक गृहमा दुई दिनसम्म परामर्श दिएर परिवारको जिम्मा लगाइएको छ । पशुपतिनगर मानव तस्करीको बाटो बन्दै गएकोप्रति चिन्ता बढिरहेको अवस्थामा पछिल्लो पटक नाकाबाटै युवतीको उद्धार गरिएको छ ।
पछिल्लो एक वर्षमा इलामबाट ६३ महिला हराएका माइती नेपालको तथ्यांकमा छ । हराएकामध्ये २२ जनालाई फेला पारेर परिवारलाई जिम्मा लगाएको ढकालले बताए । झापामा हराएका ८६ मध्ये ३० फेला परेका छन् । मोरङमा हराएका २७ मध्ये तीन र सुनसरीबाट हराएका ३५ मध्ये १५ जना फेला पारेर परिवारलाई जिम्मा लगाएको माइती नेपालले जनाएको छ ।
पछिल्लो समय तस्करहरूले महिलालाई फसाउन निःशुल्क भिसासहित आश्वासन, सुखको प्रलोभनमा नेपालको सीमा कटाउँदै आएका छन् । माइती नेपालको तथ्यांकमा नेपाली महिलाहरूलाई ५२ जिल्लाका नाका हुँदै भारतसम्म पुर्याइने गरको उल्लेख छ । दलालले मुख्य नाकाभन्दा पनि अन्तु, समाल्बुङतिरका चोरबाटो प्रयोग गर्न थालेपछि नियन्त्रण र जाँचमा समेत चुनौती थपिएको छ ।
दलालले आफू पहिले नै भारत पुगेपछि युवतीलाई बोलाउने, समाजिक सञ्जाल प्रयोग गरी प्रलोभनमा पार्ने गर्न थालेपछि आर्थिक अभाव खेपिरहेका महिलाहरू सहजै फस्ने गरेको माइती नेपालले जनाएको छ । नाकामा महिला सुरक्षाकर्मी लगाएर निरन्तर जाँच गएिए पनि दलालको जालमा परेका महिला र युवतीले आफन्तकहाँ हिँडेको लगायत बहाना बनाउने गरेकाले पनि पहिचामा निकै गाह्रो पर्ने गरेको देखिएको छ ।
विभिन्न बहानामा भारत लगिनेमा १४ देखि २७ वर्षका युवतीहरू बढी रहेको माइती नेपालले जनाएको छ । उच्चशिक्षा पढेकाहरू पनि दलालको पञ्जामा पर्ने गरेका छन् ।
गत वर्ष भारतको चारमाइलबाट पाँच जना महिलालाई भारतीय महिला सञ्जालको सहयोगमा फिर्ता गरेको घटनाले पनि तस्करहरूले चोरबाटो प्रयोग गरिरहेका पाइन्छ । माइती नेपालले सिलिगुडी, कालेबुङ, सिक्किम, चारमाइल, दसमाइललगायतबाट एक वर्षमा ३२ जना महिलालाई उद्धार गरिसकेको छ ।
इलामका पशुपतिनगर, गोर्खे, जोगमाई, समाल्बुङ, श्रीअन्तु, जिर्मलेलगायत भारतसँग सीमा जोडिएका साविक गाविसमा रहेका नाकाबाट महिलाहरू भारत पुर्याउने गरिएको पाइएको छ ।
प्रतिक्रिया दिनुहोस !
