गरिब परिचय पत्र धनीलाई वितरण भएपछि जनप्रतिनिधि नै रुष्ट
असोज ४, २०७५ बिहीबार ८:१:०
रोल्पा : सरकारले गरिबलाई दिने परिचयपत्र रोल्पामा धनीले पाएका छन् । गाउँका कतिपय गरिब परिवार परिचयपत्रबाट बञ्चित भएका छन् । धनीलाई गरिब परिचयपत्र वितरण भएकोप्रति जनप्रतिनिधि नै रुष्ट बनेका छन् ।
वास्तविक गरिबलाई परिचयपत्र वितरण नगरिएकोमा स्थानीय जनप्रतिनिधिले आक्रोस पनि पोखेका छन् । ‘गाउँपालिकाबाट वितरण गर्ने गरी आएका गरिबको सूचिमा कतिपय धनीको नाम छ’, रुन्टीगढी गाउँपालिकाका अध्यक्ष बालाराम बुढामगरले भने ।
केही सातायता रुन्टीगढी गाउँपालिकाले परिचयपत्र वितरण अभियान चलाएको छ । मंगलबार गाउँपालिकामा परिचयपत्र लिन आउनेको भिड थियो । प्रशासकीय अधिकृत शर्मिला न्यौपाने परिचय पत्रमा हस्ताक्षर गर्न व्यस्त थिईन् । अन्य कर्मचारी परिचयपत्र वाड्न तल्लिन थिए । तर, परिचयपत्र लिन आएका धेरैको गुनासो एउटै थियो, ‘परिचयपत्र धनीले पाए, गाउँका वास्तविक गरिब छुटे ।’
आफू स्वयंले परिचय वितरण गर्दै आएका अध्यक्ष बुढामगर धनीको नाम सुचीमा रहेकोप्रति सन्तुष्ट देखिएन । ‘विवरण भर्ने वेला गलत भएको हुन सक्छ । गरिब परिचयपत्र धनीको नाममा पनि आएको छ’, अध्यक्ष बुढामगरले भने, ‘वितरण गर्नु भनेर पठाएपछि दिनै पर्यो । गाउँपालिकालाई छानविन गर्ने अधिकार छैन ।’ गाउँपालिकाले परिचयपत्र वितरण गरेकाले स्थानीयले जनप्रतिनिधिकै कारण धनीलाई गरिब परिचयपत्र दिएको आरोप लगाएका छन् ।
परिवर्तन गाउँपालिकामा पनि गरिबको विवरणमा धनीको नाम पाइएको छ । ‘पक्की घर भएका, दाङमा जग्गा भएकाको पनि गरिब परिचयपत्र आएको छ’, उपाध्यक्ष हितकुमारी बुढामगरले भनिन्, ‘धनीको नाममा आएका गरिब परिचय पत्र वितरण रोक्नेबारे छलफल भयो । तर, स्थानीय तहलाई यो अधिकार छैन रहेछ ।’
विवाद नआओस भनेर परिवर्तन गाउँपालिकाले परिचयपत्र वितरण गर्नुअघि सर्वपक्षिय वैठक आयोजना गरेको थियो । धनीका नाममा आएको गरिब परिचयपत्र रोकेर वास्तविक गरिबलाई मात्र वाँड्न सुझाव आएको थियो । माडी गाउँपालिकाले पनि परिचयपत्र वितरण बीचमै रोक्नु पर्यो । यहाँ पनि कतिपय वास्तविक गरिबको विवरण आएको छैन । तर केही धनीको नाम समावेश छ । सुनछहरी गाउँपालिकामा पनि उस्तै समस्या देखिएको छ । वास्तविक गरिबको परिचयपत्र नआएकाले वितरण गर्दा कठिनाई भएको रोल्पा नगरपालिकाका मेयर पुरण केसीले बताए ।
वास्तविक गरिबको परिचयपत्र नआएको भन्दै गंगादेव गाउँपालिकाले परिचयपत्र वितरण गर्न हच्किएको छ । अध्यक्ष बीरबहादुर खत्रीले धनीको नाममा आएको गरिबको परिचयपत्र रोकेर वास्तविक गरिबको मात्र परिचयपत्र वितरण गर्नुपर्ने अडान राखेका छन् । वास्तविक गरिब छुटाइएको र केही धनीको नाममा गरिब परिचयपत्र आएपछि जिल्लाको वास्तविक गरिबीको तथ्यांक अन्यौलमा छ ।
२०७० सालमा गरिएको गरिब घरपरिवार पहिचान सर्वेक्षणले प्रदेश ५ का १२ जिल्लामध्ये कम गरिब रहेको जिल्ला रोल्पा देखाएको थियो । जिल्लाको गरिबी दर ३२.७ प्रतिशत मात्र छ । अति, मध्यम र सामान्य गरी ६९ हजार ५ सय ३८ मात्र गरिब सर्वेक्षणले देखाएका छ । २०६८ सालको राष्ट्रिय जनगणनाअनुसार जिल्लामा अनुपस्थितसहित २ लाख २४ हजार ५ सय ६ जनसंख्या छ । सर्वेक्षणमा लापरवाही भएको धेरैको भनाइ छ ।
प्रतिक्रिया दिनुहोस !
