विराटनगर : प्रदेश १ की प्रदेश सभा सदस्य विष्णुमाया तुम्बाहाम्फे संसदको रोस्ट्रममा उपस्थित हुनुअघि आफ्ना विचार र विषयबारे मनन् गर्छिन् । बोल्ने कुराको पूर्व तयारीमा लाग्छिन् । तथ्य तंथ्याक भए टिपोट र त्यसको पुनः परीक्षण गर्छिन् ।
आफूले राख्नु पर्ने राजनीतिक विषयलाई बुँदागत रुपमा नोटबुकमा उतार्छिन् । गहन विषय भए पार्टीका सहकर्मीसँग छलफल र परामर्श गर्छिन अनि मात्र प्रदेश सभाको संसदमा प्रस्तुत हुन्छिन् ।
संघीय लोकतान्त्रिक राष्ट्रिय मञ्चकी यी सांसदको प्रस्तुति प्रदेश सभाको शुभारम्भ भएकै दिन ‘दमदार’ थियो । सदनमा राम्रो र आफ्नो राजनीतिक अडान सुस्पष्ट राख्न सक्ने थोरै महिला सांसदमध्ये उनी पनि एक हुन ।
नेकपाकी उमिता बराइली पनि शून्य समय र विधेयकमाथिको सैद्धान्तिक छलफलमा खरो उत्रिन्छिन् । विषयमाथि केन्द्रित रही नअल्मलिने स्वभावकै कारण बराइलीले यो ७ महिनाको अवधिमा सदनमा दिएको धेरै प्रस्तुति सम्झन लायक छन् । तयारीबिना बराइली पनि सदनका छलफलमा सहभागी हुन्नन् ।
‘प्रारम्भका दिनका केही कन्प्युजन जस्तो थियो, प्रदेश सभाको अनुभव हाम्रा लागि नौलो नै थियो,’ उनले भनिन्,‘तर, आफ्नो विषयमा व्यापक अध्यय्न अनि प्रस्ट हुने प्रयास गर्छु । सदनमा विधेयक दर्ता भई त्यो हात परेपछि दोहो¥याएर, तेहे¥याएर पढ्छु अनि मात्र सैद्धान्तिक छलफलमा भाग लिन्छु ।’
राप्रपाकी इन्दीरा राईले अहिलेसम्म टिपोट नलिई रोस्ट्रमबाट बोलेकै छैनन्। सदनमा सभामुखले उपलब्ध गराएको समयलाई पूरापुर सदुपयोग गर्नेतर्फ उनको ध्यान केन्द्रीत हुन्छ ।
भन्छिन्,‘तीन मिनेटका शुन्य समय र सात मिनेटको सैद्धान्तक छलफलमा उपलब्ध समयमा कसरी आफ्ना विषयलाई प्रस्ट र चोटिलो ढंगले प्रस्तुत गर्ने नै ध्यान हुन्छ । म त आफूले बोल्ने विषय कागजमा टिपोट गरेर त्यसलाई व्याख्या गर्दै प्रस्तुति दिन्छु ।’ उनले तयारीसाथ सदनमा प्रस्तुत हुँदा विषयान्तर र गल्ती हुने सम्भावना कम हुने बताइन् ।
काँग्रेसकी लीला सुब्बासँग प्रतिनिधि सभाको समेत अनुभव छ । धनकुटाबाट प्रदेश सभामा प्रतिनिधित्व गर्ने सुब्बा अनुभवले समेत खारिएकी सांसद हुन । प्रदेश सभामा उनको प्रस्तुति अन्य महिला सांसदका लागि समेत निकै चासोको विषय हुने गर्छ । सुब्बा भन्छिन्,‘सदनमा जोडदार ढंगले आफ्ना विषय उठान गर्नु चानचुने कुरा होइन । म हरेक विषयमा तयारी गरेर सदनमा उपस्थित हुने गर्छु ।’ सुब्बाले जनता र उनीहरुको अधिकारसँग सम्बन्धित विषयलाई सदनमा प्रस्तुत गर्ने गरेको सुनाइन ।
नेकपाकी सावित्राकुमारी रेग्मी प्रायसो रोस्ट्रमा पुग्दा हातमा टिपोट गरिएको डायरी वा कागजसाथ प्रस्तुत हुन्छिन् । सटिक र सुस्पष्ट प्रस्तुत हुने रेग्मीका विषय वस्तुसमेत वजनदार हुने गर्छन । काँग्रेसकी नवोदिता चौधरी पनि सदनमा अब्बल विषयलाई प्रवेश गराउने महिला सांसद हुन् । भन्छिन्,‘अध्यय्न र तयारी बिना प्रस्तुत हुँदा अलमल हुन सक्छ त्यसैले तयारीसाथ जान्छु ।’
प्रतिक्रिया दिनुहोस !
