भक्तपुर : भक्तपुरमा सात वर्षपछि पहिलोपटक सितेरियो कराते तथा किक बक्सिङको उपत्यकाव्यापी प्रतियोगिता हुने भएको छ ।
भक्तपुरस्थित विद्या आर्जन सितेरियो कराते शाखा डोजोले यही असोज १२ र १३ गते प्रतियोगिता गर्ने भएको हो । आयोजक डोजोले मंगलबार यहाँ पत्रकार सम्मेलन गरी प्रतियोगितामा काभ्रे जिल्लासहित उपत्यकाका करिब ३ सय खेलाडीको सहभागिता रहने जानकारी दिएको छ ।
डोजोका अध्यक्ष सूर्यबहादुर लामाले भक्तपुरमा सितेरियो करातेतर्फ पुरुषका ९ र महिलाका आठ गरी १७ तथा किक बक्सिङमा पुरुषतर्फ ४ र महिलातर्फ ३ गरी ७ वटा विधामा भिडन्त गराइने जानकारी दिए ।
उनका सितेरियो करातेमा पुरुषतर्फ २० देखि ६० केजीभन्दा माथिको तौल समूह र खुला तथा महिलातफए २० देखि ५५ केजी तौल समूह र खुलामा भिडाइनेछ ।
त्यस्तै किक बक्सिङमा पुरुषतर्फ ४५ देखि ६० केजी तौल समूह र खुला तथा महिलातर्फ पनि ४५ देखि ५५ केजी तौल समूह र खुलामा स्पर्धा गराइनेछ । दुई दिनसम्म चल्ने उक्त स्पर्धाको लागि करिब ४ लाख रुपैयाँ खर्च हुने अनुमान गरिएको आयोजक डोजोका सचिव प्रेम थापामगरले बताए । उनका अनुसार प्रतियोगिताका सबै तौल समूहमा पहिलो, दोस्रो र तेस्रो हुने खेलाडीहरुलाई स्वर्ण, रजत र कास्य पदक र शिल्डले पुरस्कृत गरिनेछ ।
त्यस्तै सितेरियो कराते र किक बक्सिङतर्फ सर्वोत्कृष्ट एकएक महिला र पुरुष खेलाडीसमेत घोषणा गरिने उनले बताए । प्रतियोगिताको रेफ्री संयोजकमा एकेएफका मुख्य सहायक प्रशिक्षक एवं अन्तर्राष्ट्रिय रेफ्री राजेन्द्र कपाली छन् । नेपाल कराते महासंघका रेफ्री संयोजक समेत रहेका कपालीले प्रतियोगिता डब्ल्यूकेएफको नियमानुसार खेलाइने जानकारी दिए ।
प्रतियोगिता नेपाल कराते महासंघ तथा नेपाल सितेरियो कराते संघको स्वीकृतिमा सञ्चालन हुने आयोजक संस्थाले बताएको छ । भक्तपुर जिल्ला सितेरियो कराते संघको आयोजनामा २०६८ सालमा प्रतियोगिता भएपछि भक्तपुरमा यस्तो खेलको प्रतियोगिता हुन सकेको थिएन।
प्रतिक्रिया दिनुहोस !
