जर्जिया : बुद्धिचाल खेलको महाकुम्भ ‘४३औं चेस ओलम्पियाड’ का कारण जर्जियाको पर्यटकीय नगरी बटुमी अहिले व्यस्त छ । एक सय ८५ देशका खेलाडी, अफिसियल र खेल पदाधिकारीको जमघटले यो सहरलाई थप चलायमान बनाएको हो । ओलम्पियाडमा खेल र खेलाडीको चर्चासँगै अक्टोबर ३ देखि ५ तारिखसम्म हुने विश्व बुद्धिचाल महासंघ (फिडे) को चुनावी माहोलले पनि बटुमीको पारो ताताएको छ ।
फिडेको नयाँ नेतृत्व चयनका लागि विभिन्न देशका बुद्धिचाल खेलका प्रतिनिधि र पदाधिकारी चासोका साथ लागिपरेका छन् । नेपाली प्रतिनिधिको ध्यान पनि खेलाडीको प्रदर्शनभन्दा फिडेको निर्वाचनमा बढी तानिएको छ । ‘फिडेको निर्वाचन र यसले पाउने नेतृत्वले नेपाल जस्तो देशका लागि धेरै फरक पर्छ । त्यसैले हामी यता लागेका हौं’, नेपाल बुद्धिचाल संघका पूर्वअध्यक्ष एवं एसियन बुद्धिचाल महासंघ जोनल ३.२ का अध्यक्ष राजेशहरि जोशीले अन्नपूर्ण पोस्ट्सँग भने ।
नेपालले यो निर्वाचनमा अध्यक्षका प्रत्याशी रुसका अर्कादी दिभोरकोभिचलाई सघाउने तयारी गरेको पनि जोशीले बताए । ‘अर्कादी विश्व राजनीति, फुटबल र बुद्धिचाल खेलका प्रभावशाली व्यक्तित्व हुन् । उनले जितेको खण्डमा नेपाली बुद्धिचालले धेरै फड्को मार्नेछ’, जोशीले थपे । रुसी राजनीतिज्ञ, त्यसमाथि फुटबलमा लागेका व्यक्ति, कसरी बुद्धिचालमा आए होलान् । जिज्ञासा लाग्नु स्वाभाविक हो । होटेलको लविमा बसिरहेको बेला अचानक अर्कादीसँग भेट भएपछि त्यो जिज्ञासा पनि शान्त भयो ।
रुस विश्वकप फुटबल आयोजनाको स्थानीय संयोजक, रुसका अर्थविद्, विभिन्न मन्त्री हुँदै उपप्रधानमन्त्रीसमेत भइसकेका राष्ट्रपति भ्लादिमिर पुटिनका विश्वासपात्र रहेछन्, अर्कादी । उनी अहिले फिडेको अध्यक्ष पदका लागि चुनाव लड्दैछन् । अर्कादीले अन्नपूर्णसँगको कुराकानीमा चुनावका लागि आफ्नो तयारी बलियो रहेको बताए । उनी रुसी फुटबलको पनि कार्यकारी पदमा रहेछन् ।
‘विश्वकप फुटबल आयोजनाको अनुभवले पनि मलाई बुद्धिचालको विकास गर्ने बलियो आधार दिएको छ । नेपाललगायत दक्षिण एसियाली देशको बुद्धिचाल खेल विकासमा फिडेको सहयोग हुनेछ । हामी कमजोर देशहरूका लागि चारवर्षे आर्थिक योजना तयार गरेर अगाडि बढ्दैछौं । दीर्घकालीन विकासका लागि बुद्धिचाल एकेडेमी निर्माणमा सहयोग गर्नेछौं । फिडे एक्लेलै केही गर्न सक्दैन । स्थानीयसँगको हातेमालो पनि महत्वपूर्ण हुनेछ,’ अर्कादीले भने ।
अर्कादीले फुटबलमा धेरै पैसा भएकाले फुटबल र बुद्धिचाललाई सँगै अगाडि लैजाने नयाँ सोच बनाएको पनि बताए । उनी आफ्नो प्यानलले नै फिडेको चुनाव जित्नेमा समेत ढुक्क देखिए । विश्वभरको एक सय ८५ मतमा आफूले एक सय मत कटाएर छाड्ने उनको दाबी थियो । फिडेको नयाँ अध्यक्ष पदमा यिनै ४६ वर्षीय अर्कादी, ग्रिसका जर्जियोस माक्रोपाउलोस र बेलायतका निगेल सर्टबीच प्रतिस्पर्धा हुँदैछ ।
जर्जियोस र निगेल पनि ठूलो प्रोफाइनल भएका व्यक्ति हुन् । अर्कादीसँगको जस्तो सम्बन्ध नेपालको बुद्धिचालले जर्जियोस र निगेलसँग बनाउन सकेको छैन । अर्कादीले निर्वाचन जितेमा नेपाली बुद्धिचाललाई रुसबाट वार्षिक १० हजार युरो दिने सहमति भएको जोशी बताउँछन् । यसअघि नै नेपालको बुद्धिचाल खेल विकासका लागि रुसबाट ३० हजार युरो सहयोग प्राप्त भएको समेत नेपाल बुद्धिचाल संघले जनाएको छ । त्यसैले पनि नेपाली बुद्धिचालको आगामी भविष्य फिडे निर्वाचन र यसले पाउने नेतृत्वमा भर पर्ने निश्चित छ ।
प्रतिक्रिया दिनुहोस !
