काठमाडौं : नेपाल विज्ञान प्रविधि प्रज्ञा प्रतिष्ठान (नाष्ट) एक महिनादेखि उपकुलपतिविहीन छ । तत्कालीन उपकुलपति प्राडा जीवराज पोखरेलको चार वर्षे कार्यकाल भदौ १४ मा सकिएपछि नाष्ट उपकलुपतिविहीन भएको हो ।
विज्ञान र प्रविधिका क्षेत्रमा खोज, अनुसन्धान गर्न गठित सरकारी स्वायत्त संस्था नाष्ट उपकुलपति चयनमा ढिलाइ हुँदा खोज अुनसन्धानमा समस्या परेको नाष्ट कर्मचारीको गुनासो छ । ‘हामीले उपकुलपति पद खाली भएको जानकारी मन्त्रालयलाई गराइसकेका छौं’, नाष्टका सचिव बुद्धिरत्न खड्गीले भने ।
प्रधानमन्त्री नाष्ट कुलपति हुने प्रावधान छ । कुलपतिले उपकुलपति नियुक्ति गर्ने प्रचलन छ ।
उपकुलपतिका लागि चयनका लागि प्राज्ञसभा सदस्यबाट सिफारिस समिति बनाउने चलन छ । अहिलेसम्म सिफारिस समिति गठन भएको छैन । सिफारिस समितिलाई सात दिनको समय दिइन्छ । उपकुलपति नियुक्त हुन अझै समय लाग्ने देखिन्छ ।
कुलपति एवं प्रधानमन्त्री केपी ओली विदेशमा रहेकाले उपकुलपति चयनमा ढिलाइ हुन सक्ने शिक्षा, विज्ञान तथा प्रविधि मन्त्रालयका अधिकारीले आशंका व्यक्त गरे ।
राजनीतिक आस्थाका आधारमा नाष्टमा उपकुलपति चयन हुँदै आएको छ । पोखरेल कांग्रेस सरकारका पालामा नियुक्त भएका थिए । तत्कालीन सुशील कोइराला नेतृत्वको सरकारले उनलाई उपकुलपतिमा नियुक्त गरेको थियो । विज्ञान–प्रविधिको क्षेत्रमा काम गर्ने संस्थामा राजनीतिक नियुक्ति रोक्नुपर्ने माग उठ्दै आएको छ । राजनीतिक नियुक्तिले वैज्ञानिक थलोमा काम कम बढी राजनीति हुँदा नाष्टको प्रभावकारितामा प्रश्न उठ्दै आएको छ ।
प्रतिक्रिया दिनुहोस !
