लमजुङ : नागरिकद्धारा ठाडोभाका शिरोमणि उपाधी पाएका लोक गायक भेँडीखर्के साइँलाको शालिक अनावरण गरिएको छ ।
सुन्दरबजार नगरपालिका–६, स्थित लक्ष्मीनारायण मन्दिर परिसरमा उनको शालिक अनावरण गरिएको हो । राष्ट्रिय गानका रचायिता प्रदीपकुमार राई (ब्याकुल माइला) ले आइतबार दीवंगत साहिँलाको शालिक अनावरण गरेका हुन् ।
श्रष्टाको योगदान कहिल्यै भुल्न नहुने भन्दै राईले मौलिक कला, गीतसंगीतको जगेर्ना गर्नुपर्नेमा जोड दिएका थिए । ठाडोभाका संरक्षणमा साहिँलाको सक्रियता थियो । भेडीखर्के साइँला समृति प्रतिष्ठान लमजुङ सुन्दरबजारको पहलमा साहिँलाको शालिक निर्माण गरिएको हो ।
आजीवन ठाडोभाका संरक्षणमा लागेका साहिँलाको योगदानको उच्च कदर गर्नुका साथै उनको सम्झनामा शालिक ठड्याइएको भेडीखर्के साइँला स्मृति प्रतिष्ठान लमजुङका अध्यक्ष शम्शेरबहादुर लौडारीले बताए ।
दूरा गुरुङ सुमदायको सँस्कृति मानिने ठाडोभाका बचाउन सक्रिय भेडीखर्के साइँलाको वास्तविक नाम दीर्घराज अधिकारी हो । शालिक अनावरणको क्रममा लोपान्मुख मौलिक ठाडोभाका संरक्षण जनजाति समुदायका साथै नयाँ पुस्ता जुट्नु आवश्यक रहेको दूरा सेवा समाज सुन्दरबजारका उपाध्यक्ष चन्द्रबहादुर दूरा ले बताए ।
विसं १९९० भदौ २९ गते बलभद्र अधिकारी र नन्दकुमारी अधिकारीको कोखबाट साबिक सिन्दूरे गाविस–६, दुराडाँडा लमजुङमा जन्मिएका साइँलाको २०७४ साल भदौ २६ गते निधन भएको हो ।
शालिक अनावरणकै अवसरमा ठाडोभाका समेत प्रस्तुत गरिएको थियो । साहिँलाको शालिक बनाएर फूलपाती चढाउँदैमा उनको सम्मान नभएर मौलिक ठाडोभाका जोगाउन सके मात्रै भेडीखर्केको आत्माले शान्ति पाउने सहभागीले बताए।
प्रतिक्रिया दिनुहोस !
