भक्तपुर : भक्तपुरका एक सय वर्ष नाघेका तीन जना ज्येष्ठ नागरिक सम्मानित भएका छन् ।
रोटरी क्लव अफ भक्तपुरले अन्तर्राष्ट्रिय ज्येष्ठ नागरिक दिवसका अवसरमा सोमबार एकसय वर्ष पूरा भएका ज्येष्ठतम नागरिकलाई सम्मान गरेको हो । यस क्रममा भक्तपुर नपा–७ की १०७ वर्षीया गणेशमाया नापित, भक्तपुर नपा–६ की १०४ वर्षीया मानकुमारी माझी र १०० वर्ष पूरा भएकी बुद्धलक्ष्मी अवाललाई सम्मान गरिएको हो ।
उनीहरुलाई दोसल्ला ओढाएर एकएक थान न्यानो कम्बललगायत समेत प्रदान गरिएको थियो । रोटरी क्लव अफ भक्तपुरका अध्यक्ष राजकुमार सुवालले भक्तपुर नगरभित्रमात्रै ११ जना एकसय वर्षभन्दा माथिका ज्येष्ठ नागरिक रहेकोमा सोमबार उपस्थित भएका तीनजनालाई मात्रै सम्मान गरेको बताए । उनले ज्येष्ठ नागरिकसँग भएका ज्ञान तथा सीप नयाँ पुस्तामा हस्तान्तरण गर्ने उद्देश्यले उक्त सम्मान गरिएको बताए ।
‘परिवारले ज्येष्ठ नागरिकलाई बोझको रुपमा लिन थालेका छन्’, उनले भने, ‘ज्येष्ठ नागरिकलाई उपेक्षा गरिँदा धेरै भाषा, कला, संस्कृति, ज्ञान र सीप लोप भएका छन् । त्यसैले अब बाँचेका ज्येष्ठ नागरिकसँग भएका ज्ञान र सीप नयाँ पुस्तामा हस्तान्तरण गरिनुपर्छ ।’
अध्यक्ष सुवालले यसको लागि स्थानीय नगरपालिकासँग सहकार्य गर्ने रोटरी क्लवको उद्देश्य रहेको जानकारी दिए । कार्यक्रममा सम्मानित ज्येष्ठ नागरिकले आआफ्नो अनुभव र ज्ञान बाँडेका थिए ।
ज्येष्ठ नागरिकको प्रभातफेरी
भक्तपुर नपा–७ भेलुखेलस्थित सिद्धि सालिकग्राम वृद्धाश्रमले सोमबार नै ज्येष्ठ नागरिकको प्रभातफेरी निकालेको छ । बृद्धाश्रमबाट सुरु भएको प्रभातफेरी भक्तपुर नगर परिक्रमापछि बृद्धाश्रममै समापन गरिएको थियो ।
बृद्धाश्रममा ज्येष्ठ नागरिकको लागि भजनकीर्तन तथा भोजनको व्यवस्था गरिएको थियो । यस्तै बालबालिकाले सांगीतिक कार्यक्रम प्रस्तुत गरेर कार्यक्रमलाई थप रोमान्चक बनाएका थिए।
प्रतिक्रिया दिनुहोस !
