काठमाडौं : ‘ सूर्य अस्तायो भनेर कालो रात रमाउने गर्छ तर नबिर्स सूर्य भोलि फेरि उदाउनेछ ।’ फिल्म ‘छिरिङ’को यो संवाद सुनेपछि यस्तो लाग्छ, हाम्रो देश एक यस्तो नायकको खोजीमा छ जसले समाजका बेथिति जरैदेखि उखेलेर फ्याँक्न सकोस् । यस्तो नायक जसले आफ्नो ज्यानभन्दा देशको रक्षा गरोस् ।
माथिल्लो मुस्ताङका रमणीय भूभागमा छायांकन गरिएको यो फिल्ममा छिरिङ नामका दुई पात्र छन् । यी दुवैको उद्देश्य एउटै छ, त्यो हो गाउँमा अत्याचारको अन्त्य गरी शान्ति र विकास ल्याउनु । तर, असली छिरिङ को हो भन्ने भ्रमलाई फिल्मको अन्त्यसम्म कायम राखिएको छ । यशकुमारले आफू छिरिङ भएको बताइरहँदा पूरै गाउँलेको होश उड्छ किनकि वास्तविक छिरिङ (रीमा रुम्बा)को मृत्यु एक वर्षअगाडि नै मृत्यु भइसकेको हुन्छ ।
सानैमा छिरिङलाई विदेशीले अमेरिका लगेका छन् । धेरै वर्षपछि एक दिन छिरिङले गाउँमा आमालाई फोन गर्छ, ‘आमा म घर आउँदै छु ।’ गाउँ फर्किएपछि छिरिङले देख्छ, न गाउँमा बाटोघाटो बनेको छ न बिजुलीको ठेगान छ । विद्यालय भेँडा र चौंरीगाईको गोठ बनिसकेका छन् । आम्दानीको कुनै स्रोत छैन । पूरै गाउँ जिग्मे डनको ऋणी बनेको छ । फिल्मले यी कथाहरू बुन्दै जाँदा एकाएक दर्शक ७० को दशकमा पुग्छन् । फिल्मका कतिपय संवाद पुराना सिनेमाका जस्तो लाग्छन्— ‘छिरिङ हो मेरो नाम, छिरिङ’, ‘बुद्धलाई बाँदर बनाइस् लंका त जल्छ नै’, ‘चाहिँदैन यस्तो परिवर्तन जुन परिवर्तन पाउन सैयौंको लासमाथि टेकेर अगाडि बढ्नु परोस् ।’
फिल्ममा उठाइएका मुद्दा सान्दर्भिक छन् । देश प्रजातन्त्रबाट संघीयतासम्म आइपुग्दा पनि विकास र समृद्धिले फड्को मार्न नसक्नु, तस्करीले प्रोत्साहन पाउनु, यार्सागुम्बा कौडीको भाउमा बेचिनु । फिल्मको सिनेमेटोग्राफी भने गज्जबको छ । अर्कोतर्फ फिल्मको एक्सन दमदार छ ।
फिल्मका प्राकृतिक दृश्य प्रशंसा गर्नलायक छन् । कलाकारको कस्ट्युम, बोलीचाली र परिवेशले फिल्मलाई आकर्षक बनाएको छ । फिल्मको पर्दामा सानो अक्षरमा एक स्लोगन बारम्बार देखाइन्छ, ‘मोटरसाइकल चलाउँदा अनिवार्य रूपमा हेलमेट प्रयोग गरौं ।’ फिल्मभरि नै छिरिङ एउटा यस्तो आदर्श पात्र बनेको छ जो समाजको व्यथिति र विसंगतिसँग लड्छ । अन्यायविरुद्ध आवाज उठाउँछ । समाजको नेतृत्व गर्छ । वास्तवमा फिल्ममा एउटा ठूलो लडाइँ छ । त्यो लडाइँमा होमिने एक नायक देखाएको छ छिरिङले । अनि अरू थुप्रै लडाइँ जित्न छिरिङजस्तै नायकको खोजी पनि फिल्मले गरेको छ ।
फिल्ममा दुई चर्चित गायक यशकुमार र निमा रुम्बाको प्रमुख भूमिका छ । कागबेनीजस्तो चलचित्रमा अभिनय गरिसकेका निमा रुम्बाले एक्सन फिल्म छिरिङमा आफ्नो भूमिकालाई न्याय गर्न खोजेका छन् । यता यशकुमारले एक्सन हिरोको रूपमा आफूलाई परिचित गराउन खोजेका छन् । यही फिल्मबाट डेब्यु गरेकी नायिका कामना भुजेल हिमाली छोरीको भूमिकामा फिट देखिएकी छन् ।
प्रतिक्रिया दिनुहोस !
