विराटनगर : प्रदेश नम्बर १ को प्रमुख प्रतिपक्षी दल नेपाली कांग्रेसका सांसदहरु प्रदेशको नाम र राजधानीको विषयमा साझा धारणा बनाउन भन्दै छलफलमा जुटेका छन् ।
बिहीबार प्रदेशको अस्थायी राजधानी विराटनगरको एक होटेलमा २१ जना सांसदले आन्तरिक छलफल सुरु गरेका हुन् । सत्तापक्षले राजधानी र नामको विषयमा आफ्नो संसदीय दलको छलफल चलाइसकेको अवस्थामा कांग्रेसले पनि साझा धारणा बनाउन छलफल सुरु गरेको संसदीय दलका प्रमुख राजीव कोइरालाले बताए ।
कांग्रेसका प्रमुख सचेतक केदार कार्कीले भने, ‘सत्तारुढ दलले ल्याएको छलफलमा व्यवस्थापिका र कार्यपालिका अलग अलग स्थानमा हुने भन्ने सम्मको कुरा आएको छ । तर, हामीलाई यो कुरा स्वीकार्य छैन ।’
कार्कीका अनुसार सरकारले ल्याउने प्रस्तावले नै कांग्रेसको आगामी भुमिका कस्तो हुने तय हुने भएकाले नेताहरु छलफलमा सक्रिय भएका हुन् । कांग्रेस सांसद सूर्यराज राईले भने कांग्रेसभित्रै पनि अहिल्यै कुनै ठाउँ वा नामको विषयमा सहमति जुट्ने अवस्था नरहेको बताएका छन् ।
मुख्यमन्त्री शेरधन राईले राजधानी विराटनगर तर व्यवस्थापिका तथा कार्यपालिका विकेन्द्रित हुने गरी सरकारले प्रदेश राजधानीको विषय सदनमा प्रवेश गराउने अभिव्यक्ति दिएसँगै नाम र राजधानी जस्ता विषयमा नागरिकस्तरमा समेत छलफल सुरु भएका छन् ।
मुख्यमन्त्री कार्यालय तथा मन्त्रालयहरु विराटनगर, संसद इटहरी, प्रदेश प्रमुखको कार्यालय धरान र मुख्यमन्त्री सम्पर्क कार्यालय धनकुटामा राख्ने मुख्यमन्त्रीको प्रस्तावको विषयमा सत्तारुढ दल नेकपाकै सांसदबीच एकमत आइसकेको छैन।
प्रतिक्रिया दिनुहोस !
