जाजरकोट : चाडवाड नजिकिँदै गर्दा जिल्ला प्रशासनले सदरमुकाम खलंगामा बजार अनुगमन सुरु गरेको छ । चाडवाडमा अनियमितता हुनसक्ने भन्दै प्रशासनले यहाँका पसल र सार्वजनिक सवारीमा अनुगमन गरेको हो ।
अनुगमनको क्रममा धेरैजसो पसल दर्ता बिना नै संचालन भएको भेटिएको छ । सदरमुकामका ५० ओटा पसलमध्ये ४० पसल दर्ता विना संचालन भइरहेको पाइएको हो ।
विना दर्ता पसल संचालन, मूल्य सूची नटासिने लगायत समस्या देखिएपछि प्रशासनले दर्ता गर्ने, मूल्य टाँस्ने भन्दै निर्देशन दिएको प्रमुख जिल्ला अधिकारी ललित कुमार बस्नेतले बताए ।
जिल्ला प्रशासन कार्यालयको अगुवाइमा गरिएको बजार अनुगमनमा जिल्ला प्रहरी कार्यालय र उद्योग वाणिज्य संघका प्रतिनिधि समेत थिए । दर्ता नगरिएका पसललाई एक हप्ताभित्रै दर्ता गर्न प्रशासनले अल्टिमेटम दिएको छ । उक्त अवधीभित्र पसल दर्ता प्रक्रियामा नआए बन्द गरिने चेतावनी पनि दिइएको छ ।
पसल अनुगमनका क्रममा म्याद नाघेका उपभोग्य वस्तु समेत फेला परेका थिए । साथै म्याद गुज्रेका पानीका बोतल, कोक, फ्यान्टा, चिप्स, कुरमुरे लगायत सामान बरामद गरी नष्ट गरिएको बताइएको छ ।
सवारी साधनमा पनि भएको अनुगमनमा क्षमता भन्दा बढी यात्रु र सामान बोक्ने ११ वटा सवारी साधनलाई नियम उल्लंघन गरेको भन्दै त्यसो नगर्न सचेत गराइएको छ।
प्रतिक्रिया दिनुहोस !
