काठमाडौं : सुप्रिया वज्राचार्य (१९) भृकुटीमण्डपको बगैंचामा शनिबार बिहानैदेखि ‘कुमारी’को भेषमा मन्द मुस्कानका साथ उभिएकी थिइन् । बगैंचामा आउने हरकोही उनीसँग फोटो खिचाउन लालायित थिए ।
बगैंचावरिपरि विभिन्न परिकारका स्टल पनि थिए । सेन्टरमा भव्य स्टेज अनि झाँकी र चर्चित ब्यान्डहरूले लगातार मनोरञ्जन गराइरहँदा बगैंचा मानिसहरूको भीडले छोपिएको थियो । यो दृश्य ‘आईआईएमएस कार्निभल एन्ड नेपाल फुड फेस्टिभल २०१८’को हो । फेस्टिभलमा शैक्षिक परामर्शका साथै देशभरिका विविध खानाका परिकार र विभिन्न ब्यान्डको प्रस्तुति थियो ।
बगैंचामा सुप्रियालगायत पाँचजनाको समूह जीवित देवी ‘कुमारी’को पहिरनमा थिए । यी पाँचैजना हरकोही आगन्तुकको नजरमा थिए । उनीहरू बिहान ७ बजेदेखि तयार भएर त्यहाँ पुगेका रहेछन् । दिउँसोको घामले कुमारी बनेका ती पञ्चकन्या शिथिल थिए । तर पनि यी कुमारीहरूले आफ्नो थकान कसैलाई देखाएनन् र दिनभरि नै मुस्कुराइरहे ।
कार्यक्रमको भीडमा मीना डंगोल पनि भेटिइन् । नेवारी खाजाको स्वाद लिँदै उनी कन्सर्टमा मग्न थिइन् । आफ्नै कामले भृकुटीमण्डप पसेकी मीना बगैंचाभित्र मानिसको भीड देखेर पसेकी थिइन् । नयाँनयाँ परिकारका स्टल देखेर उनलाई उत्सुकता जाग्यो । एक्लै रमाइलो गर्न मन पराउने मीना भन्छिन्, ‘हाम्रो संस्कृतिको जगेर्ना हामीले नै गर्नुपर्छ ।’ यस्तो कार्यक्रमले संस्कृति जगेर्ना गर्न अझै मद्दत मिल्नेसमेत उनले बताइन् ।
इन्स्टिच्युट अफ इन्टरनेसनल म्यानेजमेन्ट साइन्सले आयोजना गरेको उक्त कार्यक्रमलाई दसैं फेस्टिभलको रूपमा पनि सेलिबे्रट गरिएको एस कलेजका सीईओ सर्वेन्द्र महर्जनले बताए । दसैंको उपलक्ष्यमा हरेक वर्ष कलेजभित्र कार्यक्रम गर्दै आए पनि योपल्ट बाहिर गर्ने प्रयास गरेको उनले बताए । ‘हामीले विद्यार्थीसँग मिलेर केही नयाँ गर्ने कोसिस गरेका हौं’, उनले भने । यो मेघा इभेन्टमा नेपाली खाना र संस्कृतिलाई प्रमोट गर्न खोजेको पनि उनले बताए ।
कार्यक्रममा गेम स्टल र फुड स्टलमा नेवारी खाजा, पाल्पाली, सुदूरपश्चिमेली खाना, थारू, मुसलमानी खाना पनि थिए ।
कीर्तिपुरको पाँगामा बरघर रेस्टुरेन्ट सञ्चालन गर्दै आएका सीताराम चौधरी फेस्टिभलमा थारू खानाको परिकार लिएर आएका थिए । थारू खानाको प्रवद्र्धन गर्न पाएकोमा उनी दंग थिए । केन्जल एन्ड ब्यान्ड, मंकी टेम्पल, कुटुम्ब ब्यान्डको प्रस्तुतिले वातावरण रोमाञ्चित बनाएको थियो ।
प्रतिक्रिया दिनुहोस !
