लिबाङ : रोल्पामा बलात्कृत साढे छ वर्षीया बालिकाको उपचारका लागि सहयोग रकम हस्तान्तरण गरिएको छ ।
विपन्न आर्थिक अवस्थाले उनको उपचारमा खर्च अभाव देखिएपछि सहयोग संकलन गरी हस्तान्तरण गरिएको हो । उपचारमा सघाउन विदेशमा रहेका रोल्पाली युवाहरुको संस्था अन्तर्राष्ट्रिय रोल्पाली सेवा समाजले संकलन गरेर यहाँ पठाएको रकम पीडित बालिकाको अभिभावकलाई हस्तान्तरण गरिएको हो ।
संकलित रकम २२ हजार समाजका प्रमुख सल्लाहकार काशीराम डाँगीको नेतृत्वमा एक टोली बालिकाको घरमै पुगेर रकम हस्तान्तरण गरेको हो । समाजका अध्यक्ष सन्दिप थापाका अनुसार ‘बलात्कृत बालिकाको उपचारमा खर्च अभाव’ सम्बन्धि समाचार सञ्चार माध्यममा प्रकाशित भएको थाहा पाएपछि रकम संकलन गरिएको हो ।
मानवीय सेवामा समाजले आर्थिक सहयोग गर्दै आइरहेको छ । घरको आर्थिक विपन्नताले बालिकाको नियमित उपचारमा कठिनाइ भएको बालिकाकी आमाले बताइन् । डेढ महिनाअघि बालिका बलात्कृत भएको खुलासा भएको थियो । जिल्ला प्रहरी कार्यालय रोल्पाका अनुसार बलात्कार गरेको आरोपित १४ वर्षीय बालकलाई पक्राउ गरी सुधारगृह पठाइएको छ ।
घाउ सुन्निएर बालिका विरामी परेपछि उनको उपचारको लागि सहायता खोजिएको हो । उपचारपछि बालिकाको स्वास्थ्यमा सुधार आइरहेको छ ।
प्रतिक्रिया दिनुहोस !
