दमौली : बन्दीपुर १ छापस्थित सडकबाट एउटा कार तल खस्दा सातजना घाइते भएका छन् । बन्दीपुर बजारबाट डुम्रेतर्फ झर्दै गरेको ग २ च ३९४७ नम्बरको कार शुक्रबार विहान साढे ११ बजेतिर दुर्घटनामा परेको हो । सडकबाट झण्डै ७० फिट तल कार खसेर भएको दुर्घटनामा परी घाइते हुने सबै बन्दीपुरका छन् ।
बन्दीपुर–२ का ३० वर्षीय पवन भट्टराई,बन्दीपुर ३ का ३० वर्षीया अस्मिता पौडेल, बन्दीपुर–२ का ४० वर्षीय श्याम नेपाली, बन्दीपुर – ४ का ५८ वर्षीया पार्वती क्षेत्री, ३० वर्षीय मदन गुरुङ, २६ वर्षीया रश्मी गुरुङ र उनका १६ महिनाका छोरा रेमन गुरुङ दुर्घटनामा परी घाइते भएको ट्राफिक प्रहरीले जनाएको छ ।
घाइतेमध्ये दुईजना डुम्रेको लक्ष्मी अस्पतालमा उपचारपश्चात घर फर्केका छन् । गम्भीर अस्मिता पौडेल र श्याम नेपालीको पोखरामा उपचार भैरहेको बताइएको छ ।
यसैबीच, म्याग्दे २ माथिल्लो गुणादीस्थित पृथ्वी राजमार्गमा पोखराबाट दमौली आउँदै गरेको ग १५ प ६०६५ नम्बरको स्कुटर र दमौलीबाट पोखरा जाँदै गरेको बा २ ख ३६८३ नम्बरको माइक्रो ठक्कर खाएको छ ।
घटनामा परी स्कुटर चालक पोखरा महानगरपालिका ५ मालेपाटनका ३९ वर्षीय होमबहादुर बुढाथोकी घाइते भएका छन् । दमौली अस्पतालबाट पोखरा थप उपचारका लागि पठाइएका उनको फिष्टेल अस्पतालमा उपचार भैरहेको प्रहरीले जनाएको छ ।
प्रतिक्रिया दिनुहोस !
