ललितपुर : केपी शर्मा ओली चार वर्षअघि पहिलो पटक प्रधानमन्त्री बन्दा पत्नी राधिका शाक्य कीर्तिपुरको भत्केपाटीस्थित बेबी लाइफ होम पुगेकी थिइन् । जहाँ २३ जना एचआईभी संक्रमित बालबालिका संरक्षित छन् ।
सरकारी निवास बालुवाटारमा रहँदा संक्रमित बालबालिकाबारेमा समाचार सुनेपछि शाक्य उनीहरु बसेको घर खोज्दै खोज्दै त्यहाँ पुगेकी थिइन् । शाक्यलाई देख्दा बालबालिकाका अभिभावक राजकुमार पुन र उमा गुरुङ आश्चर्यचकित भएका थिए ।
‘त्यसपछि यहाँ संरक्षित बालबालिकासँग ओली दम्पतीको भावनात्मक सम्बन्ध गाँसियो’, होमका सञ्चालद्वय पुन र गुरुङले भने, 'दसैँ-तिहार लगायतका चाडपर्वमा यी दम्पतीले बालबालिकालाई आफनो घरमै बोलाउँछन् । उनीहरुको स्वास्थ्य अवस्थाको चासो राख्दै र मीठो मसिनो खुवाएर पठाउँछन् ।'
गत वर्ष लक्ष्मीपूजाको दिन ‘बालबालिकालाई लिएर आउनू’भनेपछि सबै बालबालिकासहित गुरुङ र पुन ओलीनिवास बालकोट पुगेका थिए । घरमा विभिन्न समुहमा आएका देउसेसँग व्यस्त रहे पनि उनीहरुले बालबालिकालाई विषेश समय दिए ।
शाक्य आफैँले बालबालिकालाई सेलरोटी र तरकारी खुवाइन् । संरक्षित सबै बालबालिका निकै प्रतिभावान छन् । उनीहरुले ओली दम्पतीलाई मीठो गीत गाएर सुनाए, छमछमी नाचेर पनि देखाएका थिए ।
प्रधानमन्त्री हुँदा या नहुँदा पनि यी बालबालिकालाई भेट्दै आएका छन् ओलीदम्पती । यो वर्ष अत्यन्त व्यस्तताका बाबजुद यी दम्पतीले बालबालिकालाई बालुवाटारमा बोलाएर विषेश माया देखाएको पुन र गुरुङ बताउँछन् ।
बालुवाटारमा प्रधानमन्त्री पत्नी शाक्य आफैँले बालबालिकालाई बैठककक्षसम्म पुर्याएकी थिइन् । उनीहरुले एकै स्वरमा भने ‘यति ब्यस्त समयमा पनि बालबालिकालाई दुई घण्टा भन्दा धेरै समय दिनुभयो ।’बालुवाटारमा प्रम ओलीले बालबालिकासँगै खाना पस्केर खाए । बालबालिकाले खाइनसकुन्जेल दुवैजना कुरिरहे । बालबालिकाको स्वास्थ्य समस्याबारे चासोपुर्वक सोधे । गुरुङले भनिन्, ‘प्रधानमन्त्रीले समय दिएर बालबालिकासँग रमाउनुभयो ।’
२३ जना बालबालिकामध्ये सोनी बिक मीठो गाउँछिन् । उनले संरक्षित रहँदै केही गीत रेकर्डिङ पनि गराइसकेकी छन् । उनैले ‘यही धर्तीमा जन्मे यही धर्तीमा हुर्केँ तर म अटिनँ, एक्लै छोडी कहाँ गयौ बाबा मलाई किन लगेनौँ’ भन्ने गीत प्रधानमन्त्रीलई सुनाइन् ।
सोनीको आफनै भाइ सोमालिया बिकले मुखले बजाउने बाजा (बिटबक्स) बजाउँदा ओलीले निकै उत्सुकताका साथ हेरेका थिए । र, बालकहरु करण सुनार र करण थापाले पनि गीत गाउँदा प्रधानमन्त्रीले हौसला दिएका थिए ।
यसअघि सुशील कोइराला र पुष्पकमल दाहाल प्रचण्ड प्रधानमन्त्री हुँदा भेटका लागि अनुरोध गर्दा समय नपाएको सम्झना गर्दै पुन र गुरुङले ओली दम्पती आफैँले बालबालिकालाई भेट्न चासो राख्दा निकै खुसी लागेको बताए ।
२३ मध्ये प्रकाश, उर्मिला र मञ्जु लगायत अब किशोर अवस्थामा पुगिसकेका छन् र उनीहरुले आफनो पहिचान लुकाउन जरुरी नरहेको बताउन थालेका छन् । आफ्नो समाचारसँगै प्रकाशित फोटोमा अपराधीलाई जस्तो अनुहार छोपेकोमा आपत्ति जनाउँदै उनीहरुले संक्रमित बालबालिकाबारे लेखिएका कानुनी प्रावधान सुधार हुनुपर्ने तर्क उनीहरुले गरेका छन् । र, सम्बन्धित निकायले बालबालिकाको पहिचान र अधिकारबारे सोचिदिनुपर्ने पनि आग्रह गरेका छन् ।
प्रतिक्रिया दिनुहोस !
