काठमाडौँ : सत्तारुढ दल नेपाल कम्युनिस्ट पार्टी (नेकपा) को केन्द्रीय सचिवालय बैठकले केन्द्रीय कार्यसमिति सदस्यको जिम्मेवरी मिलाउन र प्रदेश समिति सदस्य छान्नका लागि २ सदस्यीय कार्यदल निर्माण गरेको छ ।
प्रधानमन्त्रीको सरकारी निवास बालुवाटारमा बिहीबार दिउँसो सम्पन्न बैठकले प्रदेश समितिमा एकता टुंग्याउने तथा केन्द्रीय सदस्यलाई जिम्मेवारी दिने प्रयोजनका लागि २ वटा कार्यदल बनाएको हो ।
नेकपाले बनाएको कार्यदलमा पार्टी महासचिव विष्णु पौडेल र सचिवालय सदस्य रामबहादुर थापा बादल रहेका छन् । पार्टी महासचिव विष्णु पौडेलले सचिवालयल बैठकबाट प्रदेश सदस्य छान्न र केन्द्रीय सदस्यलाई जिम्मेवारी दिने कुराको टुंगो लगाउने जिम्मा कार्यदलको काँधमा आएको बताए ।
यो कार्यदलले केन्द्रीय सदस्यको जिम्मेवारी र प्रदेश समिति सदस्यको छनोट गरेको विवरण सचिवालयमा पेस गर्नेछ । त्यसपछि सचिवालयले सूचीलाई अन्तिम रुप दिने निर्णय भएको हो ।
नेकपाको यसअघिको सचिवालय बैठकले पार्टीका इन्चार्ज, सह-इन्चार्ज, अध्यक्ष र सचिव छानिसकेको छ । तर त्यसमा पार्टीका केही नेताले गम्भीर असहमति जनाएका छन् ।
वरिष्ठ नेता माधवकुमार नेपाल र नारायणकाजी श्रेष्ठले यसमा फरक मत राखेका छन् । मुख्यमन्त्री भएकालाई पनि प्रदेश ईन्चार्ज बनाएको भन्दै दुवै नेताले बैठकमै नोट अफ डिसेन्ट लेखेका छन् ।
एकताको घोषणा भएको छ महिना भइसक्दा पनि केन्द्रीय कमिटी सदस्यहरुले जिम्मेवारी पाउन सकेका छैनन् । जसका कारण नेकपाका कयौँ नेता असन्तुष्ट छन् ।
प्रतिक्रिया दिनुहोस !
