सुदूरपश्चिममा कर्मचारी अभाव, १६ दरबन्दीकाे कार्यालय ६ जनाकाे भरमा
कात्तिक ८, २०७५ बिहीबार १९:८:०
बैतडी : सुदूरपश्चिम प्रदेश सरकार भूमी व्यवस्था, कृषि तथा सहकारी मन्त्रालयअन्तर्गत स्थापना भएको कृषि ज्ञान केन्द्र बैतडीमा एक उपसचिव सहित १६ जनाको दरबन्दी कायम गरियो ।
तर कार्यालय स्थापना भएको तीन महिना बितिसक्दा समेत ६ जना कर्मचारीले कार्यालय सम्हाल्दै आएका छन् । दार्चुला र बैतडी जिल्ला हेर्ने गरी स्थापना भएको कार्यालयमा कर्मचारीको अभाव रहेको कृषि ज्ञान केन्द्र बैतडीका निमित्त प्रमुख कर्णबहादुर चन्दले बताए ।
उनले भने, ‘केही समयमा कार्यक्रम नआएर समस्या भएको थियो । अब कार्यक्रम आएर कार्यान्वयनमा समस्या छ । दुई जिल्ला हेर्नुपर्ने छ । कर्मचारीको अभावमा कार्यक्रम कार्यान्वयनमा समस्या छ ।’
बैतडीकै पाटनमा स्थापना भएको भेटेनरी अस्पताल तथा पशुसेवा विज्ञ केन्द्रमा पनि कर्मचारीको अभाव छ । १२ जनाको दरबन्दी रहेको कार्यालयमा ७ जनामात्रै कार्यरत रहेको पशु सेवा प्राविधिक बिसनसिंह बिष्टले बताए । उनी भन्छन्, ‘कार्यालयमा कर्मचारी नहुँदा समस्या भएको छ । प्रदेश सरकारको मातहत स्थापना भएको कार्यालय भएकाले अझै राम्रोसँग कार्यान्वयनमा आउन सकेको छैन । कर्मचारीको अभावमा कार्यक्रम पनि अघि बढाउन सकिएको छैन ।’
यस्तै भौतिक पूर्वाधार विकास मन्त्रालयअन्तर्गत स्थापना भएको पूर्वाधार विकास कार्यालयमा पनि कर्मचारीकै अभाव छ । बैतडी, दार्चुला र बैतडीका प्रादेशिक सडक, ग्रामीण सडक र लामा झोलुंगे पुल हेर्ने जिम्मेवारी पाएको कार्यालयमा तत्कालका लागि कर्मचारीको अभाव रहेको सिनियर डिभिजनल इन्जिनियर जगतप्रसाद जोशीले बताए । भर्खरै कार्यालय स्थापना भएकाले कर्मचारीको अभाव पूर्तिका लागि तयारी भइरहेको जोशीको भनाइ छ ।
प्रदेश सरकार मातहत नै स्थापना भएका डिभिजन वन कार्यालय, महाकाली वृहत्तर जलाधार केन्द्र लगायतका कार्यालयमा पनि कर्मचारीको अभाव रहेको कार्यालयहरुले जनाएका छन् ।
कार्यालयहरुमा कर्मचारी नहुँदा कार्यसम्पादनमा समस्या देखिएको छ । चालु आर्थिक वर्षको एक चौमासिक सकिने बेलामा पनि प्रदेश सरकार मातहत स्थापना भएका कार्यालयहरुले कर्मचारी, कार्यक्रम र अख्तिायारीकै समस्या झेलिरेहका छन् । कार्यालयहरुमा कर्मचारीको अभाव हुँदा ढिलो गरी स्थापना भएका प्रदेश सरकार मातहतका कार्यालयहरुले समयमै कार्यसम्पादन गर्न असहज हुने देखिएको छ ।
प्रतिक्रिया दिनुहोस !
