सम्पत्तिको लोभमा बिहे प्रस्ताव, नमानेपछि वृद्धको हत्या

कलैया : बाराको कलैयामा घाँटी रेटेर एक वृद्धको हत्या गर्ने चारजनालाई जिल्ला प्रहरी कार्यालय बाराले पक्राउ गरी मङ्गलवार सार्वजनिक गरेको छ । कलैया उपमहानगरपालिका–२३ स्थित कोइरिया टोलमा गत शनिवार भएको ६५ वर्षीय नन्दलाल राउत कुर्मीको हत्यामा संलग्न चारजनालाई प्रहरीले सार्वजनिक गरेको हो । 

नन्दलालको हत्यामा उनकै छिमेकको संलग्नता रहेको पाइएको छ । प्रहरीले नन्दलालका छिमेकी ४५ वर्षीय वीरेन्द्रलाल प्रसाद जैसवारलाई घटनाको मुख्य योजनाकारका रूपमा सार्वजनिक गरेको छ । 

वीरेन्द्रसहित घटनामा हाल सिम्रौनगढ नगरपालिकाका साबिकको अमृतगन्ज–९ का ५५ वर्षीय जोधा भनिने राम अयोध्या दास तत्मा, वीरेन्द्रका १९ वर्षीय छोरा विशाल र ६५ वर्षीय बैजनाथ राउत कुर्मी रहेका छन् । 

घटनामा नन्दलाललाई वीरेन्द्र र रामअयोध्याले धारिलो हतियार प्रहार गरी हत्या गरेका थिए भने उनका छोरा विशाल र बैजनाथले सहयोगीको भूमिका निभाएका थिए । आर्थिकरुपमा सम्पन्न नन्दलाल सफल कृषक थिए । उनको दैनिकी खेतीपाती र माछा पोखरीमा बित्ने गरेको थियो ।

सधैँ जसो खेतको काम सकेर साँझ घर आएका नन्दलाल गोठको काम गरिरहेको अवस्थामा मारिएका थिए । उनको शव घर छेउकै आँपको रुखमुनि शनिवार राति ८ बजे फेला परेको थियो । परिवारले उनको शव देखेपछि प्रहरीलाई खबर गरेका थिए । 

त्यसबाहेक आर्थिक रूपमा सम्पन्न नन्दलालको नातिनीसँग आफ्नो छोराको विवाह गरेर सम्पत्ति हत्याउने वीरेन्द्रको सोच नन्दलालले विफल पारेका थिए । वीरेन्द्रको विवाह प्रस्ताव नन्दलालले अस्वीकार गरेका थिए । नन्दलाल र उनका भाइ अम्बिकाको संयुक्त परिवार एकै घरमा बस्थे । नन्दलालको सन्तान नभएको र भाइ अम्बिकाको एक छोरा र तीन नातिनी रहेका छन् । 

घटना लगत्तै अनुसन्धान थालेको प्रहरीले सोमबार साँझ वीरेन्द्र अन्य तीन जनालाई पक्राउ गरेको हो । घटनामा संलग्नको पहिचान गर्न तालिमप्राप्त कुकुरको समेत प्रयोग गरिएको थियो । 

घटनास्थलमा भेटिएका प्रमाण र परिवारले दिएको सूचना अनुसार शङ्का लागेर वीरेन्द्रलाई पक्राउ गरेपछि हत्याको वास्तविकता खुलेको जिल्ला प्रहरी कार्यालय बाराका प्रवक्ता एवम् डिएसपी रञ्जित सिंह राठौरले जानकारी दिए । 

डिएसपी राठौरका अनुसार नन्दलाल र वीरेन्द्रबिच केही समयअघि सामान्य मनमुटाब भएको थियो । वीरेन्द्र पनि कृषक हुन् । नन्दलालले अनुदानमा आएको रकमले पोखरी निर्माण गरेपछि वीरेन्द्र असन्तुष्ट थिए । 

त्यसबाहेक आर्थिक रूपमा सम्पन्न नन्दलालको नातिनीसँग आफ्नो छोराको विवाह गरेर सम्पत्ति हत्याउने वीरेन्द्रको सोच नन्दलालले विफल पारेका थिए । 

वीरेन्द्रको विवाह प्रस्ताव नन्दलालले अस्वीकार गरेका थिए । नन्दलाल र उनका भाइ अम्बिकाको संयुक्त परिवार एकै घरमा बस्थे । नन्दलालको सन्तान नभएको र भाइ अम्बिकाको एक छोरा र तीन नातिनी रहेका छन् । 

अम्बिकाका छोरासमेत १२ वर्षदेखि सम्पर्क विहीन भएपछि नन्दलालले सम्पूर्ण परिवारको अभिभावकत्व निभाउँदै आएका थिए । वृद्ध भए पनि परिवारको सम्पूर्ण निर्णय गर्ने नन्दलालले विवाह प्रस्ताव अस्वीकार गरेपछि वीरेन्द्र असन्तुष्ट भएर हत्या गर्ने तहमा पुगेको प्रहरीको भनाई छ । 

‘आर्थिकरुपमा सम्पन्न नन्दलालको हत्या उनको सम्पत्ति नै हत्याउन गरिएको जस्तो देखिन्छ’ डिएसपी राठौरले भने ‘नन्दलालको हत्या गरेपछि आफ्नो लागि बाटो खुल्ने योजनाका साथ वीरेन्द्र अगाडी बढेको र त्यही सोचले हत्याको योजनाको बनाएको बयानबाट बुझिएको छ ।’

घटना लगत्तै अनुसन्धानमा खटिएको प्रहरीले परिवारको बयानपछि वीरेन्द्रलाई पक्राउ गरेको थियो । वीरेन्द्रको बयानपछि अन्य पक्राउ परेको डिएसपी राठौरले जानकारी दिए । घटनामा अन्य दुई सहयोगी फरार रहेकाले खोजी भइइहेको राठौरले बताए ।