हराएकी बुहारी खोज्न गएकी सासू बेपत्ता, बुहारी मृत भेटिइन्
कात्तिक १५, २०७५ बिहीबार १२:४३:०
बैतडी : बैतडीमा सासूबुहारी बेपत्ता भएकोमा बुहारी बिहीबार मृत फेला परेकी छन्। सासू भने अझै बेपत्ता छन्। मृत फेला पर्नेमा दोगडाकेदार गाउँपालिका- ४ श्रीकेदार साउगाउँकी ३० वर्षीया निर्मला भट्ट रहेको खोचलेक प्रहरी चौकीका इञ्चार्ज प्रहरी सहायक निरीक्षक श्याम सिंह महराले जानकारी दिए। बेपत्ता हुनेमा मृतक निर्मलाकी सासू ५२ वर्षीया पार्वती भट्ट रहेकी छन्।
बुधबार घाँस काट्न भनेर घरबाट निस्केकी निर्मला साँझसम्म पनि नर्फकिएपछि उनलाई खोज्न गएकी पार्वतीसमेत बेपत्ता भएको प्रहरीले जनाएको छ। दुबैजना रातिसम्म पनि घर नफर्किएपछि घर वरपरका अन्य सदस्य खोजतलास गर्दा निर्मला बिहीबार बिहान स्थानीय ओडीगाउँ जंगलमा झुण्डिएको अवस्थामा मृत फेला परेकी हुन्।
बेपत्ता पार्वतीको खोजीका लागि प्रहरी चौकी खोचलेकबाट प्रहरी सहायक निरीक्षक श्याम सिंह महराको नेतृत्वमा टोली परिचालन गरिएको छ। घटना रहस्यमय रहेकाले थप अनुसन्धानका लागि इलाका प्रहरी कार्यालय पाटनका इन्चार्ज प्रहरी निरीक्षक राजेन्द्रबहादुर सिंह नेतृत्वको टोली समेत अनुसन्धानमा खटिएको जिल्ला प्रहरी कार्यालयले जनाएको छ।
प्रतिक्रिया दिनुहोस !
