बैतडी : बैतडीको देहीमाडौंमा जारी निंगलासैनी प्रिमियर लिग (एनपीएल) टीट्वेन्टी क्रिकेट प्रतियोगिताको उपाधिका लागि पाटन नगरपालिका र मेलौली नगरपालिका भिड्ने भएका छन् । बिहीबार भएको सेमिफाइनल आआफ्नो सेमिफाइनल खेलमा जित हात पार्दै पाटन र मेलौलीले फाइनलमा भेट पक्का गरेका हुन् । पहिलो सेमिफाइनल खेलमा पाटनले सिगास गाउँपालिकालाई सात विकेटले पराजित ग¥यो ।
निंगलासैनी खेलमैदानमा पहिले ब्याटिङ गरेको सिगास १६.४ ओभरमा ७९ रनमै समेटिएको थियो । ८० रनको लक्ष्य पाटनले ११.१ ओभरमा मात्रै तीन विकेट खर्चेर भेट्टाएको थियो । पाटनलाई विजयी बनाउन ब्याटिङतर्फ विकास विष्टले अविजित ३४ रनको योगदान गरेका थिए । सुवास विष्टले तीन विकेट लिएका थिए । सिगासका लागि भने लोकेन्द्र रावलले २७ रनको योगदान गरे पनि जित सम्भव भएन । जितसँगै पाटनले प्रतियोगितामा आफूलाई अपराजित राखेको छ ।
यसैगरी दोस्रो सेमिफाइनल खेलमा किरण ठगुन्ना र कृष्णदेव भट्टको उत्कृष्ट ब्याटिङ प्रदर्शनको मद्दतमा दशरथ चन्द नगरपालिकाको ‘सी’ टोलीलाई सात विकेटले नै पराजित गर्दै मेलौली नगरपालिकाले फाइनलमा पाटनसँगको भेट पक्का गरेको हो ।
टस जितेर पहिले ब्याटिङ गरेको दशरथ चन्द ‘सी’ ले सुरेन्द्र बीसीको ४८ तथा नरेश नाथको ३७ रनको मद्दतमा निर्धारित २० ओभरमा ७ विकेट गुमाउँदै एक सय ४८ रनको योगफल तय गरेको थियो । यद्यपि मेलौलीले १४.३ ओभरमा मात्रै तीन विकेट गुमाएर जित निश्चित ग¥यो । टोलीको जितमा किरणले ५० रनको अर्धशतकीय पालीको योगदान गरे । यस्तै कृष्णदेवले अविजित ४९ रन बनाए ।
प्रतिक्रिया दिनुहोस !
