सिमरा : दिपावलीको बेला हरेक घरमा गुन्जिरहने ‘दीयो बाली साँझको...’ गीतको गायिका आशा भोसले हुन् भन्ने धेरैलाई थाहा नहोला ! भारतीय लोकप्रिय गायिका आशा भोसलेको २८ वर्षअघि गाएको यो गीत नेपाली गायिका जमुना शर्माले रिमेक गरेकी छन् ।
२०४७ सालमा रिलिज भएको नेपाली चलचित्र चिनोमा सवेश गरिएको यस गीतको शब्द रचना तुलसी घिमिरेले गरेका हुन् भने ‘ओरिजिनल’ संगीत रञ्जित गजमेरले गरेका हुन् । भारतको मुम्बईमा बस्दै आएकी गायिका शर्माले संगीतकार रन्जित गजमेरको अनुमतीमा यो गीत फेरि गाएकी हुन् ।
भारतीय गायक कैलाश खेरको मुम्बईमा रहेको कैलाशा स्टुडियोमा रेकर्ड गरिएको यो गीत युट्यूबमा पनि दर्शक–श्रोताले मन पराएका छन् । गीतको भिडियो छायांकन मुम्बई र नेपालमा गरिएको थियो । भिडियोमा दिपावली गरिएको दृश्यमा पनौतीको उग्रचण्डी बोर्डिङ स्कुलमा छात्राले अभिनय गरेका छन् ।
यस्तै गायिका शर्माले गीत गाउँदै गरेको दृश्य भने मुम्बईको कैलाशा स्टुडियोको हो । दिपावलीलाई लक्षित गरी सार्वजनिक गरिएको नयाँ भर्सनको गीतको संगीत भने प्रमोद तिमिल्सिनाले गरेका हुन् । बाराको पथलैयाका जमुना र उनका श्रीमान समेत रहेका प्रमोद एक दशकदेखि मुम्बईको सांगितिक क्षेत्रमा काम गर्दै आएका छन् ।
प्रतिक्रिया दिनुहोस !
