लन्डन : इङ्लिस प्रिमियर लिग फुटबलको आइतबार राति खेलिएको खेलमा म्यानचेस्टर सिटी र चेल्सीले सजिलो जित हात पारेका छन् । लिग लिडर म्यानचेस्टर सिटीले साउथएम्टनमाथि ६–१ गोलको जित हात पार्यो भने तालिकाको दोस्रो स्थानमा आसीन चेल्सीले क्रिस्टल प्यालेसलाई ३–१ गोलले पाखा लगायो । म्यानचेस्टर सिटी र चेल्सी दुवैले घरेलु मैदानमा जित हात पारेका हुन् ।
चेल्सीको जितमा अल्भारो मोराटाले दुई गोलको योगदान गरे । मोराटाले चेल्सीका लागि पछिल्ला चार खेलमा चार गोल गरेका छन् । खेल सुरु भएको ३२औं मिनेटमा मोराटाले चेल्सीलाई अग्रता दिलाए । ५३औं मिनेटमा क्रिस्टल प्यालेसका एन्ड्रोस टाउनसेन्डले जवाफी गोल गर्दै खेललाई १–१ को बराबरीमा ल्याए । त्यसपछि ६ मिनेटको बीचमा लगातार दुई गोल थप्दै चेल्सीले महत्वपूर्ण तीन अंक हासिल गर्यो ।
चेल्सीका लागि ६५औं मिनेटमा मोराटाले दोस्रो गोल गरे भने ७०औं मिनेटमा पेड्रोले तेस्रो गोल थपेका थिए । फलहाम र हडर्सफिल्डबाहेक अन्य सबै टोलीले ११÷११ खेल खेलिसक्दा २९ अंकसहित म्यानचेस्टर सिटी पहिलो स्थानमा आसीन छ । चेल्सी २७ अंकसहित दोस्रो र समान अंक बटुलेको लिभरपुल तेस्रो स्थानमा छन् । लिभरपुल आफ्नो पछिल्लो खेलमा आर्सनलसँग उसैको मैदानमा १–१ गोलको बराबरीमा रोकिएको थियो ।
साउथएम्पटनसँगको खेलमा म्यानचेस्टर सिटीले आत्मघाती गोलमार्फत अग्रता बनाएको थियो । खेल सुरु भएको छैटौं मिनेटमै साउथएम्पटनका वेस्ली होएटबाट आत्मघाती गोल भएको थियो । १२औं मिनेटमा सर्जियो एग्वेरोले गोल गरेपछि म्यानचेस्टर सिटी २–० ले अगाडि बढ्यो । प्रिमियर लिगमा हालसम्म दुई सय १७ खेल खेलेका एग्वेरोको यो एक सय ५०औं गोल हो । १८औं मिनेटमा डेभिड सिल्भाले टोलीको अग्रतालाई अझ फराकिलो बनाए ।
यसैगरी ३०औं मिनेटमा डेनी इङ्सले साउथएम्पटनका लागि जवाफी गोल गरे । पहिलो हाफको खेल सकिनुभन्दा ठीकअघि रहिम स्टर्लिङले म्यानचेस्टर सिटीलाई ४–१ ले अगाडि बढाए । ६७औं मिनेटमा स्टर्लिङले नै टोलीका लागि पाँचौं गोल थपे भने निर्धारित समयको अन्तिम मिनेटमा लेरोय सेनले छैटौं गोल गरेका थिए ।
अर्को खेलमा टोट्टनहामले उल्भरह्याम्पटनलाई उसैको मैदानमा ३–२ गोलले हरायो । टोट्टनहामका लागि एरिक लामेला, लुकास मोउरा र ह्यारी केनले गोल गरे । ११ खेलबाट २४ अंक बटुलेको टोट्टनहाम चौथो र समान खेलबाट २३ अंक हात पारेको आर्सनल पाँचौं स्थानमा छन् ।
जारी सिजनको घरेलु लिगमा चेल्सी हालसम्म अपराजित रहँदै आएको छ । यसअघि सन् २००५÷०६ र सन् २०१४÷१५ सिजनमा चेल्सीले यस्तो सफलता हात पारेको थियो । ती दुवै अवसरमा चेल्सीले उपाधि पनि जितेको थियो । चेल्सीका प्रशिक्षक माउरिजियो सारी पनि ११ खेलमा अपराजित छन् । यसअघि चेल्सको प्रशिक्षकका रूपमा यस्तो सफलता सन् १९९४ मा फ्रांक क्लर्कले हात पारेका थिए । यसैगरी प्रिमियर लिगमा म्यानचेस्टर सिटीले आफ्नो अपराजित यात्रा ४३ पुर्याएको छ ।
यसबीचमा म्यानचेस्टर सिटी ३७ खेलमा विजयी भएको छ भने ६ खेल बराबरीमा टुंगिएको छ । साउथएम्पटनले भने इत्तिहाद रंगशालामा पछिल्ला नौ खेलमा जित हात पार्न सकेको छैन । यसबीचमा इत्तिहाद रंगशालामा खेलिएका आठ खेलमा साउथएम्पटन पराजित भएको छ भने एक खेल बराबरीमा सकिएको छ । पछिल्लोपटक साउथएम्पटनले इत्तिहाद रंगशालामा सन् २००४ को अप्रिलमा जित हात पारेको थियो ।
प्रतिक्रिया दिनुहोस !
