कोलकाता : भारतीय क्रिकेटर गौतम गम्भीरले खेल पदाधिकारीको क्रियाकलापप्रति आक्रोश व्यक्त गरेका छन् । उनले भारतीय क्रिकेट कन्ट्रोल बोर्ड (बीसीसीआई) र बंगाल क्रिकेट संघ (सीएबी)का पदाधिकारीप्रति आक्रोश व्यक्त गरेका हुन् । कोलकाताको इडेन गार्डेन रंगशालामा आइतबार राति खेलिएको भारत र वेस्ट इन्डिजबीचको खेलअघि क्रिकेट अधिकारीहरूले गैरजिम्मेवार कार्य गरेको गम्भीर आरोप छ ।
उक्त खेल सुरु हुनुअघि इडेन गार्डेन रंगशालामा पूर्वक्रिकेटर मोहम्मद अजहरुद्दिनलाई घन्टी बजाउन दिएर बीसीसीआई र सीएबीका पदाधिकारीले गलत परम्परालाई प्र श्रय दिएको गम्भीरको आरोप छ । भारतको इडेन गार्डेन र अन्य केही रंगशालामा अन्तर्राष्ट्रिय प्रतियोगिता सुरु हुनुअघि पूर्वक्रिकेटरलाई घन्टी बजाउन लगाएर खेल शुभारम्भ गर्ने परम्परा छ । सो प्रयोजनका लागि रंगशालामा ठूलो घन्टी झुन्ड्याइएको छ ।
भारत र वेस्ट इन्डिजबीचको पहिलो टीट्वेन्टी क्रिकेट सुरु हुनुअघि अजहरुद्दिनलाई घन्टी बजाएर खेलको शुभारम्भ गर्न लगाइएको थियो । अजहरुद्दिन खेल मिलेमतो गरेको आरोपमा बीसीसीआईबाटै प्रतिबन्धमा परेका पूर्वक्रिकेटर हुन् । ‘भारतले खेल त जित्यो तर हाम्रा खेल पदाधिकारीले गलत परम्परालाई प्र श्रय दिएकोमा दुःख लागेको छ’, गम्भीरले समाजिक सञ्जाल ट्विटरमा ट्विट गरेका छन् । उक्त खेलमा भारत पाँच विकेटले विजयी भएको थियो ।
आफ्नो समयमा चर्चित खेलाडी अजहरुद्दिन सन् २००० मा खेल मिलेमतो प्रकरणमा मुछिएका थिए । सोही आरोपमा बीसीसीआईले उनीमाथि आजीवन कुनै पनि क्रिकेट गतिविधिमा भाग लिन नपाउने गरी प्रतिबन्ध लगाएको थियो । यस्तो प्रतिबन्धविरुद्ध अजहरुद्दिनले आन्ध्र प्रदेश उच्च अदालतमा पुनरावेदन गरेका थिए । अदालतले सन् २०१२ मा अजहरुद्दिनकै पक्षमा फैसला सुनाएको थियो । त्यसपछि भने बीसीसीआईले उक्त फैसलाविरुद्ध माथिल्लो अदालतमा पुनरावेदन गरेको थिएन ।
अजहरुद्दिनले भारतका लागि ९९ वटा टेस्ट क्रिकेट खेलेका थिए । उनले ४७ वटा टेस्टमा कप्तानको भूमिकासमेत निर्वाह गरेका थिए । टेस्ट क्रिकेटमा उनले ४५.०३ को औसतमा कुल ६ हजार दुई सय १५ रन बनाएका थिए । यसैगरी उनले देशका लागि तीन सय ३४ वटा एकदिवसीय अन्तर्राष्ट्रिय प्रतियोगिता खेल्दै ३६.९२ को औसतमा कुल नौ हजार तीन सय ७८ रन बनाएका थिए ।
प्रतिक्रिया दिनुहोस !
