विराटनगर : मोरङका अलगअलग स्थानमा भएको सवारी दुर्घटनामा परेर शुक्रबार एक वृद्धसहित दुईजनाको मृत्यु भएको छ। मोरङको बेलबारी नगरपालिका- ७ दौलतपुरस्थित भित्री सडकखण्डमा उत्तरबाट दक्षिणतर्फ गइरहेको सिटी सफारीको ठक्करबाट स्थानीय ४५ वर्षीय कमला कार्कीको मृत्यु भएको छ।
मे १ ह १९१५ नम्बरको सिटी सफारीले सडकको छेउमा उभिएकी कार्कीलाई बिहीबार राति ९ बजे ठक्कर दिएर गम्भीर घाइते बनाएको थियो। घाइतेको उपचारका क्रममा विराटनगरको गोल्डेन अस्पतालमा शुक्रबार बिहान मृत्यु भएको जिल्ला ट्राफिक प्रहरी कार्यालय मोरङले जनाएको छ।
चालक बेलबारी नगरपालिका ७ का ५० वर्षीय ईन्द्रबहादुर श्रेष्ठ फरार रहेका कारण खोजी भइरहेको जानकारी प्रहरीले दिएको छ। त्यस्तै पूर्वपश्चिम राजमार्ग अन्तर्गत सुन्दरहरैंचा नगरपालिका ४ बाँसबारी चौकमा मोटरसाइकलले ठक्कर दिंदा स्थानीय ७० वर्षीय कृष्ण पराजुलीको मृत्यु भएको छ।
पैदल हिंडिरहेका बेला बुधबार साँझ पूर्वबाट पश्चिमतर्फ जाँदै गरेको मे ७ प १६९१ नम्बरको मोटरसाइकलले ठक्कर दिएर पराजुलीलाई गम्भीर घाइते बनाएको थियो। घाइते पराजुलीको विराटनगरको गोल्डेन अस्पतालमा उपचारका क्रममा शुक्रबार विहान मृत्यु भएको ट्राफिक प्रहरीले जनाएको छ।
मोटरसाइकल र चालक झापाको मेचीनगर नगरपालिका ७ का ४५ वर्षीय चोमेन्द्रबहादुर थापालाई नियन्त्रणमा लिएर घटनाको अनुसन्धान सुरु गरिएको जानकारी प्रहरीले दिएको छ।
प्रतिक्रिया दिनुहोस !
