आगलागीमा ६० लाख क्षति, दमकल नहुँदा निभाउन ढिलो
विराटनगर : मोरङको उर्लाबारी नगरपालिका–७ इटहरा रोडस्थित एउटा घरबाट सुरु भएको आगलागी अढाइ घण्टापछि मात्रै नियन्त्रणमा आयो ।
भक्तिराम अधिकारीको घरमा मंगलबार दिउसो साढे २ बजे सुरु भएको आगो साँझ ५ बजे मात्र नियन्त्रणमा लिइएको हो । आगलागीमा ६० लाख भन्दा बढीको क्षति भएको प्रहरीको अनुमान छ ।
स्थानीय कविता बस्नेतका अनुसार ताला लागेको र मान्छे नभएको अवस्थामा घरमा आगो लागेका कारण भित्रको किराना पसलमा पनि क्षति पुगेको छ । इँटा र ढुँगाले बनेको दुईतले घर पूर्ण रुपमा जलेर नष्ट भएको छ । प्रारम्भिक अनुसन्धानका आधारमा विद्युत सर्ट भएर आगो लागेको अनुमान छ ।
घरधनी अधिकारीले ५० लाख भन्दा बढीको किराना पसल, पसलमा भएका सबै सामान, १२ हजार रुपैयाँ नगद, दुई तोला सुन, काठपात, लत्ताकपडा, खाद्यान्न लगायत सामान जलेको बताएका छन् ।
इलाका प्रहरी कार्यालय उर्लाबारीका प्रहरी निरीक्षक रामप्रसाद तिमल्सिनाका अनुसार आगोले छिमेकी अर्जुन न्यौपानेको घरमा पनि सामान्य क्षति पुग्दा एक लाख मुल्य बराबरको क्षति भएको छ ।
घटनापछि समयमै दमकल पनि त्यहाँ पुग्न सकेन । उर्लाबारी नगरपालिका र छिमेकी गाउँमा समेत एउटा पनि दमकल नहुँदा आगलागीको बेला यस्तै अप्ठ्यारो पर्दै आएको छ ।