रामेछाप : मन्थलीका हार्डवेयर व्यवसायीहरुले अनियमितता गरेको भन्दै जिल्ला प्रशासन कार्यालयले व्यवसायीलाई चेतावनी दिँदै एउटा पसलमा तालाबन्दी गरिदिएको छ ।
म्याद गुज्रीएका सामान बेच्ने, प्राइभेट फर्म नविकरण नगर्ने र बिल पनि नदिने जस्ता उजुरी उपभोक्ताहरुले गरेपछि मन्थलीसिथत शुभलक्ष्मी हार्डवेयर तथा सप्लायर्समा जिल्ला प्रशासन कार्यालयले शिलबन्दी गरिदिएको हो ।
सहायक प्रमुख जिल्ला अधिकारीको नेतृत्वको गएको जिल्ला अनुगमन समितिको टोलीले शुभलक्ष्मी हार्डवेयर तथा सप्लायर्समा शिलबन्दी गर्दै अन्य व्यवसायीलाई चेतावनी दिएको छ ।
पटक पटकको अनुगमनपछि सच्चिन आग्रह गर्दा उल्टै अनुगमन टोलीलाई नै अभद्र व्यवहार गरेपछि हार्डवेयर पसलमा ताला लगाइएको अनुगमन समितिका संयोजक एवं सहायक प्रमुख जिल्ला अधिकारी यज्ञ प्रसाद शर्माले बताए ।
जिल्ला प्रहरी कार्यालय, घरेलु तथा साना उद्योग समिति, मन्थली नगरपालिका, रामेछाप उद्योग बाणिज्य संघ, राष्ट्रिय उपभोक्ता मञ्च र नेपाल पत्रकार महासंघ रामेछापका प्रतिनिधिहरुको रोहवरमा ताला लगाइएको जिल्ला प्रशासन कार्यालयले बताएको छ ।
ताला लगाइएपछि शुभलक्ष्मी हार्डवेयर तथा सप्लायर्सका संचालक सीताराम श्रेष्ठले भने आफूमाथि अनुगमन समितिले गलत आरोप लगाएर ताला लगाएको गुनासो गरको छन् ।
रामेछापको सदरमुकाम मन्थलीमा एक दर्जन भन्दा बढि हार्डवेयर पसलहरु संचालनमा छन् । भुकम्पपछि भवन पुननिर्माणमा लक्षित गर्दै खुलेका हार्डवेयर पसलहरुले अनियमितता गरेको जनगुनासो पछिल्लो समय बढ्न थालेको छ ।
प्रतिक्रिया दिनुहोस !
