ललितपुर : चिनियाँ कम्पनीले निर्माण रोकेपछि चक्रपथ सुधार आयोजनाअन्तर्गत आकाशेपुल बन्न ढिलाइ हुने भएको छ । चिनियाँ कम्पनी साङघाई कन्स्ट्रक्सन गु्रपले मंसिर २९ सम्ममा निर्माण सकेर सरकारलाई सडक हस्तान्तरण गरेपछि मात्र आकाशेपुल निर्माण हुने चक्रपथ सुधार आयोजनाका प्रमुख सुजन खनालले बताए ।
८ लेनको चक्रपथ बने पनि आकाशेपुल र जेब्राक्रस नहुँदा दुर्घटनाको जोखिम अत्यधिक बढेको भन्दै स्थानीय रुष्ट छन् । केही साताअघि मात्र सडकको बीचमा डिभाइडर राखिएको र त्यसले गर्दा बाटो काट्न २ किलोमिटर टाढा पुग्नुपर्ने बाध्यता रहेको एकान्तकुनाका केशव पौडेलले जनाए । ‘जेब्राक्रस र आकाशेपुल नभएका कारण जतासुकै बाटो काटिरहेकाछन्’, उनले भने, ‘यसले दुर्घटनाको जोखिम बढाएको छ ।’
आयोजना प्रमुख खनालका अनुसार सडक निर्माण नसकुन्जेल ठेकेदार साङघाई कन्स्ट्रक्सनले अन्य काम गर्ने अनुमति दिएको छैन । उनले भने, ‘ठेकेदार आफ्नो डिजाइनभन्दा एक इन्च पनि यताउता गर्न चाहँदैनन् ।’ चिनियाँ कम्पनीले बनाउनुपर्ने आकाशेपुल निर्माण भइसके पनि सरकारले बनाउने पुलमा अवरोध गरेको उनले जनाए ।
प्रमुख खनालका अनुसार सरकारको भागमा चक्रपथमा ६ वटा आकाशेपुल बनाउने सम्झौता छ । सातदोबाटो, एकान्तकुना र चापागाउँ दोबाटोमा भइरहेको पुल निर्माण चिनियाँ ठेकेदारले रोकिदिएको जानकारी पनि उनले दिए । चीनबाट कम्पनीका प्रतिनिधि आएर हेरेपछि सडक ठीक बनेको वा नबनेको परीक्षण हुने र त्यसपछि मंसिर २९ सम्ममा हस्तान्तरण गर्ने जानकारी आफूले पाएको उनले बताए । ‘उनीहरूले हस्तान्तरण गरिसकेपछि मात्र आकाशेपुल बनाउने अनुमति पाएका छौं, यतिबेला चिनियाँ डेलिगेसनको पर्खाइमा छौं’, उनले भने ।
चिनियाँ कम्पनीले पहिला नै निर्माण सुरु गरे पनि सरकारले ती पुल बनाउने जिम्मा धेरै पछि मात्र लिएको उनको भनाइ छ । ‘हस्तान्तरण गर्नेबित्तिकै काम सुरु गर्नेछौं, ढिला भयो भनेर ठेकेदार पनि गनगन गरिरहेको छन्’, उनले भने, ‘तर काम समयमै सक्छौं । चिनियाँले रोकिदिएको समय थपिदिनुपर्छ भनेका छौं ।’
यतिबेला चक्रपथ फिनिसिङ भइरहेको र हस्तान्तरणपछि मात्र जेब्रा क्रसिङ कहाँ राख्ने निधो हुने उनले जानकारी दिए । चक्रपथमा सवारीचालकलाई अनुशासित बनाउन ठेकेदारले नै डिभाइडर राखेको भए पनि आफूले पनि एकान्तकुनास्थित कार्यालय पुग्न नै कठिन भएको अनुभव गरेको उनले बताए । निर्माण क्रममा घरटहरा हटाउन, रेलिङ बनाउन, कम्पाउन्ड भत्काउन र जग्गा विवादले पनि काममा विलम्ब भएको स्विकार्दै उनले कतिपय ठाउँमा ठेकेदारले नै ढिला गरेको उनको भनाइ छ ।
आयोजनाका इन्जिनियर निरञ्जन शर्माले चिनियाँ कम्पनीको भन्दा धेरै पछि मात्र सरकारले पुल निर्माण थालेको जानकारी दिए । चिनियाँ कम्पनीको डिजाइनमा पनि के कस्ता सुधार आवश्यक पर्छन् त्यसैअनुसार काम गर्दै जाने सहमतिअनुसार यसको सुरुवात भएको उनले जानकारी दिए ।
चक्रपथको १० दशमलव ३९ किलोमिटर कोटेश्वर–कलंकीखण्ड सुधारका लागि सन् २०१२ डिसेम्बर १८ मा चीन र सरकारबीच द्विपक्षीय सम्झौता भएको थियो ।
प्रतिक्रिया दिनुहोस !
