फिदिम : स्थानीयले जग्गा उपलब्ध गराएको २० वर्षपछि फिदिम नगरपालिका–२ पल्लोटारमा बसपार्क निर्माणले पूर्णता पाएको छ । दोस्रो पटक उद्घाटन गर्ने तयारी रहेको निर्माण पक्षले जनाएको छ । बसपार्कको काम शतप्रतिशत पूरा भएको निर्माण कम्पनीका सुपरभाइजर सन्तोष थापाले बताए । ‘अधिकांश काम सकिएको छ’, उनले भने, ‘काम सकिएकाले बसपार्क उद्घाटनको तयारी छ ।’
पूर्वाधार र सम्भाव्यता हेरेर मात्र पार्किङ गर्ने अडान यातायात व्यवसायीले लिएपछि उद्घाटन गरिए पनि बसपार्क सञ्चालनमा आएको थिएन । तत्कालीन प्रमुख जिल्ला अधिकारी कोषहरि निरौलाले चार वर्षअघि बसपार्क उद्घाटन गरेका थिए । पर्याप्त पूर्वाधार नभएको भन्दै यातायात व्यवसायीले सवारी साधन पार्किङ गर्न अस्वीकार गरेका थिए ।
उनीहरूले फिदिम–१ स्थित फिदिम उच्च माविको जग्गामा गाडी पार्किङ गर्दै आएका छन् । नयाँ सहर आयोजनाले पूर्वाधार निर्माणका लागि बजेट छुट्याएपछि साढे सात रोपनी जग्गा प्राप्त भएको दुई दशकमा मात्र बसपार्क निर्माणले पूर्णता पाएको हो । आयोजनाले बसपार्क निर्माणका लागि १ करोड ८७ लाख ८६ हजार रुपैयाँ लगानी गरेको छ ।
त्यसअघि बजेट अभावका कारण बसपार्क लथालिंग अवस्थामा थियो । ‘आयोजनाले पूर्वाधार निर्माणलाई पनि प्राथमिकता दिने गरेको छ’, आयोजनाका सूचना अधिकारी रामप्रसाद सापकोटाले भने, ‘बजेट छुट्टिएपछि बसपार्क निर्माणको काम सकिएको छ ।’
सरकारले पटक–पटक गरी २० लाख बजेट बसपार्कको पूर्वाधार निर्माणमा छुट्याएको थियो । जसबाट चर्पी, यात्रु प्रतीक्षालय र टिकट काउन्टरका लागि भवन बनाइएको थियो ।
हिम्दुङ एन्ड थोकर÷पाथीभरा÷शुभकामना जेभी निर्माण कम्पनीले बसपार्क निर्माणलाई पूर्णता दिएको हो । कम्पनीले दुई वर्षभित्र काम सक्ने गरी २०७३ फागुन ३० गते आयोजनासँग सम्झौता गरी काम अघि बढाएको थियो ।
प्रतिक्रिया दिनुहोस !
