विराटनगर : मोरङको विराटनगर महानगरपालिका–१७ धुनिया बस्तीका २२ वर्षीय चुनु मण्डलले बिहीबार राति चक्कु प्रहार गरेर आफ्नै बावुको हत्या गरेको खुलेको छ ।
राति ९ बजे पारिवारिक झगडाको क्रममा विवाद चर्किँदै गएपछि चुनुले चक्कु प्रहार गरेर ५० वर्षीय बावु शशी मण्डलको हत्या गरेको प्रहरीसमक्ष स्वीकार गरेका छन् ।
मोरङ प्रहरीका प्रवक्ता डिएसपी घनश्याम श्रेष्ठका अनुसार चक्कु प्रहारपछि गम्भीर घाइते भएका शशीको उपचारका क्रममा राति १० बजे विराटनगरको नोबेल शिक्षण अस्पतालमा मृत्यु भएको हो । चक्कुले उनको बायाँ कोखामा गम्भीर चोट लागेको थियो ।
झगडाको स्रोत दुई परिवार
शशीले बहुविवाह गरेका थिए । शशी, उनको जेठी पत्नीतर्फका छोरा २५ वर्षीय आकाश मियाँ मण्डल र कान्छी श्रीमतीतर्फका छोरा चुनुबीच घरयासी विवाद भएको थियो ।
त्यही विवाद बढेर उग्र रुप लिएपछि चुनुले चक्कु निकालेर बुवा शशी र जेठी आमा तर्फका दाजु आकाशलाई प्रहार गरेका थिए । चक्कु प्रहारबाट सौतेनी दाजु आकाश समेत घाइते भएका छन् । उनको पनि नोबेलमै उपचार भइरहेको छ ।
चक्कु प्रहार गर्ने चुनुलाई पक्राउ गरेर कर्तव्य ज्यान मुद्दा चलाउन म्याद थप गरेर अनुसन्धान अघि बढाइएको प्रहरीले जनाएको छ । चक्कु भने प्रहरीले बरामद गर्न सकेको छैन ।
प्रहरीका अनुसार चुनु आपराधिक पृष्ठभुमिका युवा हुन् । उनी नेपालबाट मोबाइल चोरी गरेर भारतमा पु¥याएर बिक्री गर्ने धन्दामा लामो समयदेखि संलग्न रहेको पत्ता लागेको इलाका प्रहरी कार्यालय रानीका प्रहरी निरीक्षक ईन्द्रबहादुर रानाले बताए ।
‘चुनुको आपराधिक फेहरिस्त लामो छ,’ रानाले भने, ‘पटक पटक प्रहरीले पक्राउ गरेर कारवाही समेत गरिसकेको देखिन्छ ।’ चुनुकी पत्नी अप्सरा खातुन समेत चोरी मुद्दामै मोरङ कारागारमा छिन् । पती र पत्नि नै मिलेर चोरी गर्ने र विभिन्न खालका झैझगडा एवं आपराधिक गतिविधि गर्ने गरेको प्रहरी निरीक्षक रानाको भनाइ छ ।
प्रतिक्रिया दिनुहोस !
