‘राष्ट्रिय टोलीबाट अन्तर्राष्ट्रिय प्रतियोगिता खेलेर बिदा हुने इच्छा अझै छ’
मंसिर २९, २०७५ शनिबार २१:३०:०
काठमाडौं : शनिबारको खेलसँगै अन्तर्राष्ट्रिय क्रिकेटमा ह्याट्रिक गर्ने पहिलो र शतक प्रहार गर्ने दोस्रो नेपाली खेलाडी शक्ति गौचनले करिअर टुंग्याएका छन् ।
१८ वर्ष खेलेका शक्तिलाई कीर्तिपुरस्थित त्रिवि क्रिकेट मैदानमा खेलाडीहरूले ‘गार्ड अफ अनर’सहित बिदाइ गरे । अरुले काँधमा बोकेर मैदान परिक्रमा गराउँदा उनले आँसु थाम्न सकेनन् ।
नेपाली क्रिकेटका ‘लिजेन्ड्री फिगर’ शक्तिको बिदाइ खेलमा सयौं दर्शकले साथ दिए । उनले एभरेस्ट प्रिमियर लिग (ईपीएल) आफ्नो करिअरको अन्तिम घरेलु प्रतियोगिता हुने बताएका थिए । त्यसअनुसार उनको टोली पोखरा राइनोजले शनिबार अन्तिम खेल खेल्दा शक्ति अन्तिम पटक मैदानमा थिए ।
‘दोस्रो पालिमा मेरो बलिङको पालो आएपछि मात्रै करिअरको अन्तिम खेल खेल्दैछु भन्ने भाव आयो’, शक्तिले अनुभव सुनाए, ‘आफ्नो करिअरको अन्तिम ओभर बलिङ गर्दा छक्का र चौकाबाट बच्न पाए हुन्थ्यो भन्ने सोचिरहेको थिएँ । अन्त्यमा यो माहोलले भावुक बनायो । अहिलेसम्म तपाईंहरूले दिनुभएको मायाका लागि सबैलाई धन्यवाद दिन चाहन्छु ।’
शक्तिले पहिले नै नेपालमा आयोजना हुने अन्तर्राष्ट्रिय प्रतियोगिता खेलेर राष्ट्रिय टोलीबाट बिदा लिने घोषणा गरिसकेका थिए । उनका लागि त्यो अवसर अहिलेसम्म जुरेको छैन । र, जुर्ने सम्भावना पनि कम छ । त्यसैले बिदा हुँदै गर्दा उनी केही दुःखी पनि थिए । यद्यपि आफूले सोचेजस्तै बिदाइ पाउने आशा उनले मारिहालेका छैनन् ।
‘मैले फेरि त्यही कुरा गर्दा घाउ कोट्याएजस्तो हुन्छ । मैले अपेक्षा गर्नुभन्दा पनि अरूले गर्नुपर्ने हो । तर, क्यान नभएको अवस्थामा त्यसको सम्भावना कम देखेको छु’, शक्तिले भने, ‘राष्ट्रिय टोलीबाट अन्तिम पटक अन्तर्राष्ट्रिय प्रतियोगिता खेलेर बिदा हुने इच्छा र आशा अझै छ ।’
शक्ति नेपाली क्रिकेटका यस्ता खेलाडी हुन्, जसले सबैभन्दा बढी समय राष्ट्रिय टोलीबाट खेलेका छन् । सन् २००२ मा एसीसी ट्रफीअन्तर्गत ओमानविरुद्धको खेलबाट सिनियर राष्ट्रिय टोलीमा डेब्यु गरेका शक्तिले त्यसयता निरन्तर १६ वर्ष खेले । राष्ट्रिय टोलीमा उनको छवि अलग छ । उनी फरकफरक भूमिकामा भए पनि सधैं मुख्य खेलाडी रहे । खेल जीवनको सुरुमा उनी ब्याट्सम्यान थिए । तर करिअरको अन्तिम वर्षमा आइपुग्दा उनी पहिलो नम्बरको स्पिन बलर बन्न पुगे । उनले राष्ट्रिय टोलीबाट यी दुवै भूमिकामा कीर्तिमानी प्रदर्शन गरेका छन् ।
शक्तिले अन्तर्राष्ट्रिय क्रिकेट काउन्सिल (आईसीसी) विश्वकप छनोटअन्तर्गत सन् २००५ मा इटालीविरुद्धको खेलमा एक सय तीन बलमा अविजित एक सय ६ रनको शतकीय पालि खेलेका थिए । यस्तै सन् २०१२ को मार्चमा आईसीसी टीट्वेन्टी विश्वकप छनोटअन्तर्गत डेनमार्कविरुद्धको खेलमा ह्याट्रिक विकेट लिएका थिए ।
नेपाली क्रिकेटले अन्तर्राष्ट्रिय प्रतियोगितामा आफ्नो बलियो उपस्थिति जनाउन सुरु गर्दादेखिका प्रमुख खेलाडी शक्तिले टोलीको पछिल्ला सबै सफलतामा महŒवपूर्ण योगदान पु¥याएका छन् । नेपालले सन् २०१२ मा पहिलोपटक एसीसी ट्रफीको उपाधि जित्दा, टीट्वेन्टी विश्वकपका लागि छनोट पक्का गर्दा र पहिलोपटक सन् २०१४ मा बंगलादेशमा भएको टीट्वेन्टी विश्वकप खेल्दाको ऐतिहासिक क्षणमा उनी टोलीका मुख्य खेलाडी थिए । साथै गत मार्चमा नेपाली टोलीले पहिलोपटक एकदिवसीय टोलीको मान्यता पक्का गर्दा पनि उनी टोलीसँगै थिए ।
त्यसैले खेलजीवनबाट बिदा लिए पनि शक्तिलाई यही कीर्तिमान र योगदानबाट नेपाली क्रिकेटले सधैं सम्झिरहने छ । सन्यासपछि आफूले धेरै कुरा ‘मिस’ गर्ने उनको भनाइ छ । ‘अहिले नै मलाई सोध्नुहुन्छ भने म बोल्नसक्ने अवस्थामा छैन’, शक्तिले भने, ‘तर, पहिलो कुरा यो मैदानलाई मिस गर्नेछु । यो क्षणलाई मिस गर्नेछु र धेरै कुरालाई मिस गर्नेछु ।’
उनले सन् २०१४ मा विश्वकप खेल्नु आफ्नो जीवनकै अविस्मरणीय क्षण भएको बताए । उनले आगामी दिनमा कुनै पनि हैसियतमा नेपाली क्रिकेटका लागि योगदान पुर्याउन प्रस्ताव आएको अवस्थामा आफू सधैं तयार रहेको पनि बताए ।
प्रतिक्रिया दिनुहोस !
