विराटनगर : इलाका प्रहरी कार्यालय रंगेलीले एक साताको अवधिमा ११ जना फरार अभियुक्तलाई पक्राउ गरेको छ ।
अदालतबाट विभिन्न समयमा दोषी ठहर भए पनि फरार रहेका र पक्राउ गर्न नसकिएका विभिन्न मुद्दाका प्रतिवादीलाई पक्राउ गरेर अदालतमा बुझाइएको प्रहरीले बताएको छ ।
जवरजस्ती करणी मुद्दाका तीनजना, लागुऔषधका तीन, बहुविवाहका दुई, चोरी मुद्दाका एक र अंशवण्ड मुद्दाका दुईजना प्रतिवादीलाई पक्राउ गरिएको बताइएको छ ।
अंश मुद्दा बाहेकका प्रतिवादीलाई अदालतले ४५ दिनदेखि तीन वर्षसम्म कैद सजाय र जरिवानाको फैसला गरेको थियो । अदालतका स्रेस्तेदार ईश्वरमणि ओझाले प्रहरीले पक्राउ गरेर बुझाएका फरार प्रतिवादीमध्ये कैद सजाय भएकालाई कारागार चलान गरिएको र जरिवाना मात्रै भएकाले जरिवाना तिराएर छाडिएको जानकारी दिए ।
लागुऔषध मुद्दाका ४० वर्षीय मदन मियाँ र बहुविवाह मुद्दामा फरार रहेका २७ वर्षीय मुकेश मण्डललाई प्रहरीले पक्राउ गरेको हो । लागुऔषध मुद्दामा अदालतले दोषी ठहर गरे पनि सुनवर्षी नगरपालिका–८ का मियाँ साढे चार वर्षदेखि फरार थिए । जिल्ला अदालत मोरङले उनलाई २०७१ साल असार १८ गते दुई वर्ष कैद र एक लाख रुपैयाँ जरिवानाको फैसला सुनाएको थियो ।
इलाका प्रहरी कार्यालय रंगेलीका प्रहरी निरीक्षक कवीन्द्र कार्कीका अनुसार उनलाई साईकलमा हिँडिरहेको अवस्थामा सुनवर्षी नगरपालिका–६ झपडतलबाट सोमबार बिहान पक्राउ गरिएको हो । ट्रयाक्टरमा लागुऔषध ‘कोरेक्स’ ओसारपसार गर्दै गरेको अवस्थामा प्रहरीले ट्रयाक्टर नियन्त्रणमा लिने क्रममा मियाँ भने फरार भएका थिए ।
यस्तै बहुविवाह मुद्दामा रंगेली नगरपालिका–७ का मण्डललाई मोरङ अदालतले २०७३ साल जेठ २ गते एक वर्ष कैद र पाँच हजार रुपैयाँ जरिवानाको फैसला सुनाएको थियो । उनी पनि साढे दुई वर्षदेखि फरार थिए ।
प्रहरीको फरार सूचीमा रहेका उनी जुट मिलमा काम गर्दै आएको खुलेको छ । जुट मिलमा काम गर्न विराटनगर आउनको लागि बस चढ्ने तयारी गर्दा मण्डललाई रंगेली ७ पिपल चोकबाट आइतबार साँझ पक्राउ गरिएको प्रहरी निरीक्षक कार्कीले बताए । जिल्ला अदातल मोरङमा सोमबार बुझाइएका दुबैजनालाई अदालतले कैद सजाय भुक्तानका लागि कारागार चलान गरेको छ ।
यस्तै लागुऔषध मुद्दामा अदालतले २०७१ सालमै तीन वर्ष कैद र २५ हजार रुपैयाँ जरिवानाको फैसला सुनाए पनि फरार रहेका रंगेली–९ का करण ऋषिदेव भनिने अर्जुन सरदारलाई प्रहरीले पक्राउ गरेको छ ।
दर्वेसा चोकबाट पक्राउ परेका उनलाई आइतबार अदालतमा बुझाइएको र अदालतले सजाय भुक्तानका लागि कारागार चलान गरेको प्रहरीले जनाएको छ । आफन्तको घरमा लुकेर बसेको सूचनाका आधारमा परिचालित प्रहरी टोलीले उनलाई पक्राउ गरेको बताइएको छ ।
प्रतिक्रिया दिनुहोस !
