खोटाङ : डेढ वर्षदेखि बन्धक बनाएर राखिएकी दिप्रुङ चुइचुम्मा गाउँपालिका–६ छितापोखरीकी ३३ वर्षीया रमिला तामाङको मंगलबार गाउँपालिकाले उद्धार गरेको छ। मानसिक सन्तुलन गुमाएको आरोपमा वि.सं २०७४ असार १४ गतेदेखि बन्धक बनाएर राखिएकी तामाङलाई श्रीमानसँगै थप उपचारका लागि काठमाडौं पठाइएको छ।
विवाहबन्धनमा बाँधिएको सात वर्षपछि मानसिक सन्तुलन गुमाएको भन्दै उनलाई बन्धक बनाइएको हो। तामाङलाई गाउँपालिकाका अध्यक्ष भुपेन्द्र राईले प्रहरीको सहयोगमा उद्धार गरेका हुन्। तामाङको अवस्था हेर्दा उनलाई बन्धक बनाउनुपर्ने कारण नदेखिएको अध्यक्ष राईले बताए। काठको टाँड बनाएर चारैतिर जाली राखेको अवस्थामा तामाङलाई उद्धार गरिएको हो।
तामाङको उपचार गाउँपालिकाले गर्ने गरी उद्धार गरिएको हो। उनको उपचार धरानमा सम्भव नभएपछि घरमा ल्याई बन्धक बनाइएको तामाङका छिमेकीले बताएका छन्। तामाङको उपचारका लागि तत्काल १० हजार सहयोग गरिएको राईले जानकारी दिए। तामाङका एक छोरी र एक छोरा छन्। तामाङका श्रीमान् खेती किसानी गर्दै आएका छन्।
प्रतिक्रिया दिनुहोस !
