राजविराज : सप्तरीको तिलाठी कोइलाडी गाउँपालिका कार्यालयका सुरक्षागार्ड परशुराम मिश्रको हत्यारालाई अविलम्ब पक्राउ गरी कडा कारवाही गर्न माग गर्दै बुधबार स्थानीयहरुले राजविराजमा प्रदर्शन गरेका छन् ।
घटनाको पाँच दिन बितिसक्दा पनि दोषीलाई पक्राउ गर्न नसकेको भन्दै उनीहरु आक्रोशित भएका हुन् । स्थानीयले तिलाठी कोइलाडी–२ लौनियाका शैलेन्द्र मुखियामाथि किटानी जाहेरी गर्दै उनलाई पक्राउ गर्न प्रहरीलाई दबाब दिएका छन् ।
गत शनिबार बञ्चरोको बिँडले प्रहार गरी परशुरामको हत्या गरेको भन्दै उनीहरुले मुखियालाई किटानी जाहेरी दिएका हुन् । बञ्चरो प्रहारबाट घाइते भएका तिलाठी कोइलाडी–१ का २७ वर्षीय रिकेश भनिने परशुराम मिश्रको उपचारका क्रममा आइतबार राति मृत्यु भएको थियो ।
मिश्र र मुखियाको गत शनिबार दिउँसो सामान्य कुटपिट भएकोमा सोही दिन साँझ लौनियास्थित विद्यालय अगाडि नास्ता खान गएका मिश्रलाई मुखियाले बञ्चरोको बिँडले प्रहार गरी घाइते बनाएका थिए । घटनालगत्तै मुखिया फरार छन् ।
आइतबार तिलाठीस्थित स्थानीयहरुले राजविराज–कुनौली सडकखण्ड अवरुद्ध पारेर प्रदर्शन गरे पनि हालसम्म हत्यामा सलंग्नलाई प्रहरीले पक्राउ गर्न सकेको छैन ।
हत्यारालाई अविलम्ब पक्राउ गरी कडा कारवाही नगरिए आन्दोलन चर्काउने भन्दै स्थानीयले प्रदर्शन गर्दै आएका छन् । प्रहरी उपरीक्षक राजेन्द्र विष्टले भने हत्यामा सलंग्नको पहिचान भइसकेकोले चाँडै पक्राउ गरिने बताएका छन् ।
प्रतिक्रिया दिनुहोस !
