बिर्तामोड : भद्रपुर–बिर्तामोड सडकखण्डको बीचमै हाल दुईवटा बाँसको गेट निर्माण गरिएका छन् ।
भद्रपुर बस स्ट्याण्डबाट बिर्तामोडको मुक्ति चोकको बीच भागमै निर्माण गरिएका यी गेट स्थानीय सरकार वा जिल्ला ट्राफिक कार्यालय कसैसँग पनि अनुमति लिएको हैन ।
गोठवीर राई स्मृति फुलबल प्रतियोगिता आयोजक र चासोक तङ्गनाम पर्व आयोजकले ती दुईवटा गेट बनाएका हुन् । बाँसको गेट निर्माणपछि गेट भत्किएर बाटो अवरुद्ध हुने खतरा उत्तिकै छ । निर्माणको बेला सडक पनि भत्किएको छ ।
ट्राफिक प्रहरीका अनुसार गेटकै कारण सवारी साधन, पैदल यात्री घाइते हुने जोखिम छ । दुई गेट मात्रै हैन, विभिन्न कार्यक्रमको स्वागतका नाममा बिर्तामोडका मुख्य राजमार्गमा अनुमति विना नै बीच सडकमै बाँसका गेट बनाउने क्रम रोकिएको छैन ।
यस्ता गेटले सडकमा ट्राफिक जाम बढाउने र हावा– हुरीले लडाउँदा दुर्घटना समेत बढ्न थालेको छ । आयोजकले यस्ता गेट बनाउनुअघि जिल्ला ट्राफिक प्रहरी कार्यालय वा स्थानीय सरकार कसैसँग पनि अनुमति लिने गरेका छैनन् ।
खुलेआम रुपमा सडक नै भत्काएर र सडक छेकेरै गेट बनाउने गरेका छन् । जिल्ला ट्राफिक प्रहरी कार्यालय झापाका प्रमुख राजेश राई यस्ता गेट आफूहरुलाई नसोधी रातको समयमा बनाउने गरेको बताउँछन् ।
कार्यालयमा पूर्व जानकारी समेत नदिने गरेको उनको भनाइ छ । ‘कच्ची गेट भएकाले ढलेर दुर्घटना हुने जोखिम छ, रातभरी आयोजकले गेट बनाउने र बिहान हेर्दा गेट बनिसक्ने हुन्छ,’ राई भन्छन् ।
सार्वजनिक स्थलमा यस्ता गेट निर्माण गर्न स्थानीय सरकारको वडाले नगरपालिकाको कार्यालयलाई पत्रचार गरेपछि अनुमति पाए गेट निर्माण गर्न सकिने प्रावधान छ ।
बिर्तामोड नगरपालिकाका प्रवक्ता अग्निप्रसाद पाण्डे पनि आफूहरुसँग यस्ता गेट निर्माणको लागि अनुमति लिन कोही नआएको बताउँछन् ।
प्रतिक्रिया दिनुहोस !
