सिरहा : सखुवानन्कारकट्टी गाउँपालिका–२ सोठियाइन गाउँको मनेलाल जनता माविमा यस वर्ष कक्षा ११ मा २५ र १२ कक्षामा २२ गरी ४७ जना विद्यार्थी भर्ना भए ।
विद्यालयमा भने न विद्यार्थी भेटिन्छन् न उनीहरुलाई पढाउने शिक्षक र कक्षाकोठा नै । भर्ना भएका विद्यार्थीहरुले कक्षामा पढ्नै पाउँदैनन् । एकै पटक फारम भर्ने बेला आउँछन् र परीक्षामा सहभागी हुन्छन् ।
०६७÷०६८ सालमै कक्षा ११ र १२ पढाउने अनुमति पाएको यस विद्यालयमा सुरुको ‘ब्याच’का विद्यार्थीलाई कक्षामै पढाइए पनि केही वर्षयता भने विद्यार्थी विद्यालयमा उपस्थित नभएरै परीक्षा दिँदै आएका छन् । अचम्म त के भने, विद्यार्थीहरुले वर्षभरीको शुल्क तिर्नुपर्छ ।
कक्षा ११ मा वर्षभरको चार हजार सात सय रुपैयाँ र कक्षा १२ मा चार हजार ५ सय रुपैयाँ विभिन्न शिर्षकमा शुल्क लिने गरिन्छ । रजिष्ट्रेशन, परीक्षा, स्टेशनरी, पुस्तकालय र मासिक पढाइ वापत शुल्क लिने गरेको विद्यार्थीको गुनासो छ ।
हाजिरी पठाइन्छ, अनुदान आउँछ
कक्षा सञ्चालन नभए पनि परीक्षाकै लागि विद्यालयले हाजिरी प्रमाणित गरी राष्ट्रिय परीक्षा बोर्ड कार्यालय लहानमा पठाउँदै आएको छ । प्रधानाध्यापक राजेन्द्र यादवका अनुसार उच्चमाविका लागि पढाउने छुट्टै शिक्षक नभएकाले यस्तो समस्या आएको हो । यतिसम्म कि, दसैंयता नै एक दिन पनि पढाइ नभएको स्वीकार गर्छन् प्रधानाध्यापक यादव ।
त्यसो त, कक्षा ११ र १२ मा पढाउने गरी एक शिक्षकको दरबन्दी पनि छ । तै पनि हालसम्म नियुक्त गर्न नसकेको यादवको भनाइ छ । ‘दुई वर्षदेखि व्यवस्थापन समिति पनि छैन । व्यवस्थापन समितिका लागि अभिभावक भेला बोलाउँदा पनि कसैले चासो देखाउँदैनन्,’ यादवले भने ।
स्थानीय मनोजकुमार यादवका अनुसार अधिकांश शिक्षक स्थानीय भएकैले पढाइमा उनीहरु हेलचक्र्याइँ गर्दै आएका छन् । व्यवस्थापन समितिको लागि पनि प्रअले पहल गरेका छैनन् । ‘स्थानीय शिक्षक हुँदा विद्यालयमा राजनीति बढी हुन्छ,’ मनोजकुमार भन्छन्, ‘शिक्षकहरु विद्यालय आउँछन्, हाजिरी गर्छन् र घरको काममा हिँड्छन् ।’
पुस्तकालय छैन तर पैसा आउँछ !
विद्यालयमा पुस्तकालय छैन । तै पनि विद्यार्थीबाट शुल्क र गाउँपालिकाबाट पुस्तक खरिदका लागि सरकारी अनुदान आइरहन्छ । गाउँपालिकाका शिक्षा शाखा प्रमुख वीजय यादवका अनुसार पुस्तकालय वापत गत आर्थिक वर्ष २०७४÷०७५ मा ५० हजार रुपैयाँ पठाइएको छ । चालु आर्थिक वर्षमा पनि यही विद्यालयका लागि पुस्तकालय वापत अनुदान गाउँपालिकामा आएको छ ।
कक्षा ६, ७ र ८ मा कम्प्युटर विषयको पढाइ हुन्छ । तर, ती कक्षाका विद्यार्थीहरुले कम्प्युटर प्रयोगात्मक गर्नै पाउँदैनन् । किताबमा कम्प्युटर हेरेकै भरमा विद्यार्थीहरु परीक्षा दिन्छन् ।
विद्यार्थीहरुले पढाइको लागि पटक पटक गुनासो गर्दै आए पनि शिक्षक नभएको, कक्षा कोठा नभएको वहानामा पढाइ नै हुने गरेको छैन । तै पनि उनीहरु परीक्षा दिनुअघि विभिन्न शिर्षकमा छुट्याइएको शुल्क तिरिरहन्छन् ।
प्रतिक्रिया दिनुहोस !
