भोजपुर : सक्कली भन्दै नक्कली सुन बेच्दै ठगी गर्ने ६ जना भारतीय पक्राउ परेका छन्। पौवादुङ्मा गाउँपालिका वास्तिमस्थित गहना बनाइदिन्छु भन्दै ठगी गर्दै हिँड्ने ६ जना भारतीय नागरिकलाई सुन पगाल्ने केमिकलसहित प्रहरीले नियन्त्रणमा लिएको हो।
स्थानीय दिलमाया प्रधान, मेनुका प्रधान र बेनमाया प्रधानलाई पुराना सुनबाट नयाँ गरगहना बनाइदिन्छु भन्दै सुन लुकाएको र त्यो सक्कली सुनको सट्टा केमिकलको प्रयोगले पहेँलो धातुको नक्कली सुनको गरगहना बनाइदिएर अन्यत्र जाने क्रममा प्रहरीले नियन्त्रणमा लिएको जिल्ला प्रहरी कार्यालय भोजपुरले जनाएको छ।
पछिल्लो केही महिनायता सानोदुम्मा, ठूलोदुम्मा हुँदै वास्तिममा सुन ठगी गर्दै हिँडेका ती व्यक्तिबारे स्थानीयबासीले थाहा पाएपछि आफूहरुले प्रहरीलाई जानकारी गराएको स्थानीय हर्कबहादुर लकान्द्रीले बताए।
सुन ठगीमा संलग्न भारत विहार मोतिहारी घोडासहन १४ का ३१ वर्षीय लबकुश साह, २२ वर्षीय जितेन्द्र साह, १९ वर्षीय श्रवण कुमार साह, २२ वर्षीय रविन्द्र साह, १८ वर्षीय रमेश कुमार साह र ३६ वर्षीय राकेश कुमारलाई पक्राउ गरिएको जिल्ला प्रहरी कार्यालय भोजपुरले जनाएको छ।
ती ६ जना भारतीय नागरिकलाई जिल्ला प्रहरी कार्यालय भोजपुरमा ल्याई ठगीसम्बन्धी कसूरमा मुद्दा दर्ता गरी आवश्यक अनुसन्धान भइरहेको डीएसपी केशब कुमार थेबेले बताए।
प्रतिक्रिया दिनुहोस !
