खाडा अग्नीपीडितलाई राहत जुट्दै
कालिकोट : कालिकोट खाडाका अग्नी पीडित बालबालिकाहरुलाई राहत वितरण गरिएको छ । हाल चीनमा बस्दै आएका जिल्लाको रकु निवासी युवा व्यवसायी दिलबहादुर कठायत, केशव कठायत लगायत चीनमा रहेका नेपालीहरुको सहयोगमा खाडामै पुगेर अग्नीपीडित बालबालिकाहरुलाई राहत वितरण गरिएको हो ।
खाडाका अग्नी पीडित बालबालिकाहरुलाई तत्कालका लागि ४ सय थान स्वीटर, ४ सय थान टाउजर, बालबालिलाई ४ सय थान कापी, ४ सय थान कलम गरी१ लाख ३० हजारको बराबरको सामान र खाडास्थित गण्ोश आधारभूत बिद्यालयलाई ७० हजार नगद सहयोग गरिएको दिलबहादुर कठायतले बताए ।
आगलागीमा हुँदा १३० जना बालबालिकाहरु प्रभावित भएको समाचार अन्नपूर्ण पोष्टमा पढेपछि आफूहरुले सहयोग जुटाई भाइ केशब कठायतलाई खाडामै पठाएर राहत वितरण गरिएको दिलबहादुरले बताए ।
उनले यसअघि पनि व्यक्तिगत लगानीमा रकुमै आएर निशुल्क स्वास्थ्य शिविरसंचालन गरेको थिए ।
खाडाका आगलागी पीडितहरुलाई राहत जुट्ने क्रम जारी छ। पलाँता गाँउपालिका अध्यक्ष लक्ष्मणबहादुर बमले खाडाको बस्ती पुननिर्माणका लागि व्यक्तिगत रुपमा १५ लाख सहयोग गर्ने घोषणा गरेका छन् । त्यस्तै नेपाली कांग्रेसको केन्द्रीय कार्यालयले ८ लाख ७० हजार हजार दिने निर्णय गरेको नेपाल तरुण दलका माहासचिव भुपेन्द्रजंग शाहीले जानकारी दिएका छन् ।
कालिकोट कै रास्कोट नगरपालिकाले १ लाख, तिलागुफा नगरपालिकाले २ लाख ५१ हजार, शान्नीत्रिवेणी गाँउपालिकाले २ लाख, पचालझरना गाँउपालिकाले १ लाख ५१ हजार, नरहरीनाथ गाँउपालिकाले २ लाख, शुभकालिका गाँउपालिकाले १ लाख ५१ हजार दिने घोषणा गरेका छन् ।
त्यसैगरी काठमाडौं अध्यायरत विद्यार्थीहरुले २४ बोरा लत्ताकपडा संकलन गरी कालिकोट ल्याउने तयारी भएको उमाकान्त न्यौपानेले जानकारी दिए ।
नेत्रबिक्र चन्द विप्लव नेतृत्वको नेकपाले खाडामै पुगेर प्रतिपरिवार २ हजार नगद र ३ थालीका दरले राहत बाँडेको छ ।
सम्बन्धित फोटो ।