कालिकोटका आगलागी पीडितलाई मनाङका सांसद कर्मा घलेको सहयोग
पुष १४, २०७५ शनिबार १६:३२:०
काठमाडौं : नेपाली कांग्रेसका संघीय सांसद कर्मा घलेले कालिकोट जिल्ला पँतला गाउँपालिका–१ खाँडागाउँस्थित न्यौपाने बस्तीमा भएको आगलागीका पीडितहरुको लागि १ लाख रुपैयाँ सहयोग गरेका छन् ।
घलेले कालिकोट नेपाली कांग्रेसका जिल्ला सभापति हर्षबहादुर बममार्फत काठमाडौंमा एक कार्यक्रम गर्दै सहयोग रकम हस्तान्तरण गरेका हुन् । ‘जो जहाँ भए पनि एकले अर्काको दुःखमा साथ दिनुपर्ने’ भन्दै मनाङका बासिन्दा घलेले मानवताका नाताले पीडितहरुलाई सहयोग गरेको बताए ।
यस्तो दुखद अवस्थामा पीडितलाई साथ दिन सबैसँग आग्रह समेत गरेका छन् । कालिकोट अगलागीका पीडीतलाई गरेको सहयोगका लागि कांग्रेस जिल्ला सभापति हर्षबहादुर बमले सांसद घलेलाई धन्यवाद दिँदै ठूलो राहतको महसुश हुने बताए ।
आगलागीका पीडित परिवार पालमा बस्न बाध्य भएको र चिसोका कारण उनीहरुको अवस्था कठिन बन्दै गएको बमले जानकारी गराए । उनीहरुलाई खध्यान्न, न्यानो कपडा लगायत समस्या भएको कारण थप सहयोग अवश्यक रहेको भन्दै सबै नेपालीहरुलाई सहयोग गर्न बमले आग्रह गरे ।
कालिकोटको दुर्गम गाउँ खाँडाको न्यौपाने बस्तीमा गत पुस ९ गते आगलागी हुँदा ८७ घर जलेर नष्ट भएका थिए । आगलागीमा परी ५ जना घाइते भएका थिए भने दर्जनौ पशु चौपाया मरेका थिए । कालिकोटको बिकट गाउँ खाँडा पुग्न सदरमुकाम मान्मादेखि गाडी र पैदल यात्रा गर्दा ८ घन्टा लाग्छ ।
प्रतिक्रिया दिनुहोस !
